Latest News

Mizoram leh Assam ramri hnaihah Police tam zawk awmna tur hmunpui siam turin sawrkar phut

Joint Action Committee on Inner Line Reserved Forest Demand leh Mizoram-a Political Party leh NGO te chuan Mizoram leh Assam ramri hnaihah Police tam zawk awmna tur hmunpui a rang thei ang bera siam turin Mizo-ram sawrkar an phut thu an sawi.

Nimin khan Joint Action Committee on Inner Line Reserved Forest Demand leh mizoram-a Political Party zawng zawng leh NGO zawng zawngte chuan Aizawl-a MZP Conference Hall-ah Joint Meeting neiin tunhnaia ramri a thil thleng chungchang an sawiho a. He Joint Meeting-a tel te hian Resolution 9 siamin Mizoram Inner Line Forest chungchanga Assam lamin buaina an rawn siam emaw, an rawn luh apianga kan Police Force ten a hmun hma an thlen zung zunga hma lakna an neih vat theih nan Mizoram sawrkar chu Mizoram leh Assam ramri hnaih ah Police Force tam zawk awmna tur hmunpui a rang thei ang ber a siam tura an phut thu hi an sawi a. Mizoram leh Mizo hnam a lo dam a, a lo him theih nan Mizoram Sawrkar chu a rang thei ang bera Schedule Cast and Schedule Tribe (Prevention of Attrocities Act) enkawltu tur leh Dan lekkawhtu tur Officer ruat thuai tura an phut thu an sawi bawk.

Hei bakah hian he Joint Meeting hian Assam Sawrkar chu Mizoram chhunga Police a rawn dah leh bu a khuar tir te chu thu leh awm lova a rang thei ang bera Status Qua atanga lachhuak tura an phut thu pawh sawiin, a lachhuak lo a nih chuan eng buaina pawh thleng se Mizoram leh Mizo mipuite mawh an phur lo ang tih an sawi a. India Sawrkar Home Ministry kaihhruaina hnuaia Status Qua maintain tura tih chu Assam hian vawi tam tak a bawhchhe tawhin a zahlo em em nia sawiin, “He thutlukna awmsa an zahlohna ah hian India Sawrkar hian July 21, 2021 hma ngeiin Assam Sawrkar chungah Action la rawh se,” an ti bawk.

Assam Sawrkar hian Mizoram leh Mizo mipuite Tribal hnam kan nihna hi min hmusit in min thamlo hle nia an hriat thu pawh Joint Meeting hian sawiin, vawi tam tak Officer leh Police te lo lutin Mizoram chhunga Mizote huan a mi Thlai leh Thlam te rawn ti chhia in mipui bungrua (Public Property) an rawn tichhia chu an ngaithiam lo hle tih an sawi a. Heng mimal huan thlai leh Thlam bakah mipui bungrua an tihchhiatna zang-nadawmna (Componsation) hi Assam Sawrkar leh India Sawrkar chu pa vat tura an phut thu sawiin, “Tribal kan nihna min hmusit a, huan leh thlai an tihchhiatna vang hian Assam Chief Minister leh Forest Minister bakah mawhphurtu Officer te lakah hian a rangthei ang berin Schedule Cast and Schedule Tribe Prevention of Attrocities Act 1989 hnuaiah July 21, 2021 ral hma ngeiin Action la in hremna pe rawh se,” an ti bawk.

He Joint Meeting hian Assam sawrkar chu Bangladesh atanga lo lut, India khua leh tui ni lo (Illegal Migrant) te tan ram zawn sak tawh lo tura hriattirin, Mizoram Chief Secretary leh Assam Chief Secretary ten inbiakna an neih leh turah Mizoram Chief Secretary chu All Political Parties leh All NGOs te Joint Memorandum pel-a thil engmah ti lo turin an ngen tih an sawi bawk.

Assam leh Mizoram kan buai apianga Assam ramri lam a awm khua ten hma tawng a an lo hmachhawn thin leh zamlo-a hma an lo la thin chu Joint Meeting chuan lawmawm an tih thu leh thinlung taka an chungah an lawm thu pawh sawiin, Joint Action Committee on Inner Line Reserved Forest Demand thalai te leh ramri dep thalaite chuan Inner Line venhim nan Venbuk hmun 2-ah siam a ngaih avangin Mizo mipuite tam lua leh tlem lua awm lova Venbuk sakna tur sum leh pai thawmkhawm sak turin thinlung takin an ngenin an sawm tih an sawi bawk.

Comments

Chhiar Hlawhte