Latest News

NHM hnuaia thawk ten lungawilohna lantir an tum

National Health Mission (NHM) hnuaia thawktu intelkhawm, NHM Employee Union, Mizoram (NEUM) chuan naktuk, July 13 atangin ni thum chhung Casual Leave la-a lungawilohna lantir tumin ruahmanna an siam mek.

National Health Mission Employee Union, Mizoram (NEUM) hian ni sawm chhung zet Mizoram sawrkar hun an pek hnuah an duhdana inbiakna kalpui a nih loh avangin Casual Leave hi lak an tum tih an sawi a, NHM lama an hotu ten theihtawp chhuahpui thin mah se, sawrkar lam hotu lam ten an ngaihtuah tawk lo nia an ngaih thu sawiin, tunhnaia inbiakna an neihah pawh Secretary Level-a inbiakna bak an neih theih loh thu leh Secretary Level-a inbiakna an neih chu hlu viau mah se, an dinhmun ngaihtuahin Ministry Level atang lo chuan chinfel theihloh thil tam tak a awm thu an sawi a ni.

NEUM President Malsawmtluanga Hauhnar chuan tunhnaia sawrkar nen inbiakna an neih ah COVID-19 hri an kai avanga in enkawlna senso anmahni an lo pek tir tawh mi pariat te chu an sum chawi an re-imbursed sak nghal tih sawiin, hun lo kal zel turah NHM thawktute chu Free Treatment an tih sak tur thu pawh hrilh an nih thu leh, an hlawh tang pawh tifel thuai turin hma pawh an lo lak sak nghal tih a sawi a. Amah-erawh chu an thilphut engemaw zat tihhlawhtlin sak tura hmalakna a awm loh avangin a ruala chawlh lak (mass casual leave) hi an tum ta tho tih a sawi a. “A ruala chawlh kan lak chuan damlo enkawlna, Sample Collection, Sample Testing, COVID-19 vaccine pek te chu a khaihlak lo thei dawn lo a ni. Chutihrualin kan dinhmun hi kan ngaihtuah tel ve loh theih loh avangin mipui hriatthiamna kan ngen a ni,” a ti bawk.

NEUM lam hian July, 2020 khan Health & Family Welfare Department hnuaiah Regular post ruak a awmin NHM hnuaia thawktu te hi MoHFW, GOI duhdan anga a ngheta luh theih dan tur ruahmanna an thlen tawh tih thuchhuah siamin an lo tarlang tawh a, H&FW hnuaia regular post ruak a awma 70% dah nghet tura an lo sawiho tawh chu tihhlawhtlin ngei an phut thu leh Health Department hnuaiah hian post 700 chuang hnawhkhah loh a awm thu an tarlang bawk a ni.

Hei bakah hian kum 15 thawk tawh te Special Scheme siamsak nise ti a kum 2019-a thu dah pawh tun thlenga hmalakna leh hmasawnna awm lo nia sawiin, Central sawrkarin kum 2011-a thuchhuah a lo neih tawh, State sawrkarin plan felfai tak siama kum 5 thawk tawh chin regularise tura a tih pawh hi kan State tan a harsat an rin thu leh kum 10 thawk tawh chin tal hi chu State sawrkarin regularise/absorb ngei tura an phut thu an tarlang a. Tunah hian kum 15 thawk tling tawh mi 56 an awm thu leh kum 20 chuang thawk pawh an awm thu an sawi bawk.

Comments

Chhiar Hlawhte