Hri kai 757 hmuh an ni tawh

Serchhip District-ah COVID-19 hri kai 757 hmuhchhuah ni tawhin an zinga 724 te chu enkawl dam an ni tawh.

Zirtawpni khan Serchhip District-a TrueNat Laboratory-ah Sample 4 enfiah niin Rapid Antigen Test hmangin Sample 125 enfiah ni bawkin hri kai hmuhchhuah an awm lova. Inrinni khan TrueNat Laboratory-ah Sample 12 enfiah niin hri kai pakhat hmuhchhuah a ni a. Hri kai hmuhchhuah hi Aizawl Electric Veng mi, khawdang-a zin tur Serchhip-a Negative Certificate lak tum niin hri kaina hriatloh a ni a, Rapid Antigen Test hmanga Sample enfiah 35 ah hri kai hmuhchhuah an awmlo thung.

Serchhip District-a COVID-19 hri kai enkawl zingah Inrinni khan mi 6 te chu Nursing School CCC atanga chhuahtir niin an vai hian BSF Sipai vek an ni a. Nimin khan hri kai mi 7 te enkawl dam an ni leh bawkin an zinga mi 2 te hi Nursing School CCC atanga chhuahtir niin Dar-nam Veng ami ve ve an ni a, midang 5 hi 4C Chhingchhip atanga chhuahtir an ni thung.

Heti hian nimin thleng khan Serchhip District-a hri kai hmuhchhuah chu 757 an ni ta a, an zinga 731 te chu enkawl dam ni tawhin tunah hian hri kai enkawllai 23 an awm mek a, hri kai zingah nunna chan mi 3 an awm tawh bawk a, hri kai hmuhchhuah atanga zaa 95.56 te chu enkawl dam an ni tawh a ni.

Serchhip District-ah hian hri leng avanga mahni In lama inkhunghrang mi 11, sawrkar hmun-hmaa inkhunghrang 113 leh vantlang hmun-a inkhunghrang 2 an awmmek bawk a ni.