Hri kai leh dam awm belh

Serchhip District-ah COVID-19 hri kai hmuh-chhuah an la awm belh ve zel a, hetihrual hian hri kai zingah enkawl dam an awm belh ve zel bawk.

Pathianni khan Serchhip District-a TrueNat Laboratory-ah Sample enfiah awm lovin Rapid Antigen Test hmangin Sample 54 enfiah a ni a, heng atang hian hri kai mi 23 hmuh niin Thenzawl ami an ni a, hri kai tawh nen inkawm-hnaihna neih an ni. Thenzawl-ah hian hri kai hmuh-chhuah ten an kawmhnaih chhuina kal zelah nimin khan Rapid Antigen Test hmangin hri kai mi 4 hmuh belh leh an ni bawk.

Nimin khan Serchhip District-a hri kai en-kawl mi 4 te chu anmahni enkawlna hmun atanga chhuahtir an ni ve leh a, heng hri kai enkawl dam te hi BSF Sipai vek niin Nursing School CCC atanga chhuahtir an ni.

Heti hian nimin thleng khan Serchhip District-a hri kai hmuhchhuah chu 804 an ni ta a, hri kai hmuhchhuah zinga 758 te chu enkawl dam ni tawhin tunah hian hri kai enkawllai 36 an la awm mek a, hri kai zingah nunna chan mi 3 an awm tawh bawk a ni. Heng bakah hian hri leng avanga inkhunghrang pawh mi 44 lai an la awm bawk a ni.