Mizoram-ah COVID-19 hrik, Delta Variant bakah Alpha Variant leh Eta Variant a awm tih finfiah a ni

COVID-19 chungchanga Mizoram sawrkar thu puangtu leh State Nodal Officer, Dr. Pachuau Lalmalsawma chuan Mizoram-ah COVID-19 hrik, Delta Variant bakah Alpha Variant leh Eta Variant a awm tih finfiah a ni tih sawiin, Mizoram District hrang hrangah heng hrik thar hi a awm theih tawh thu a sawi bawk.

State Nodal Officer & Official Spokesperson on COVID-19, Dr. Pachuau Lalmalsawma hian nimin khan thuthar thehdarhtute kawmin he thu hi a sawi a, Mizoram-ah COVID-19 hrik chhuak thar a awm leh awm loh finfiah tura Mizoram atanga COVID-19 hri kai te Swab Sample 100 Whole Genome Sequencing tura National Institute of Biomedical Genomics (NIBMG), Kalyani, West Bengal-a an thawn result niminpiah-a an hriat thu sawiin, Sample 100 an thawn zinga 75 ah COVID-19 hrik thar chi thum hmuh a nih thu a sawi a. Heng hrik thar hmuh te hi Delta (B.1.617.2) Variant - 73, Alpha (B.1.1.7) Variant - 1 leh Eta (B.1.525) Variant - 1 a nih thu a sawi bawk.

Dr. Pachuau Lalmalsawma chuan Aizawl District-a Sample lak 70 zingah Sample 56 chu Delta Variant a nih thu leh Alpha leh Eta Variant pakhat ve ve an nih thu a sawi bawk a, Lunglei District-a Sample 10 lak zingah Sample 9 chu Delta Variant vek niin Kolasib District-a Sample lak 10 zingah Sample 5 chu Delta Variant vek an nih thu te leh Serchhip District-a Sample 10 lak zingah Sample 3 chu Delta Variant a nih thu a sawi bawk.

Alpha leh Eta Variant te hi United Kingdom atanga lo piang chhuak a nih avangin rampawn atanga khualzinte rawn kenluh, kan inkaidarh tak a ni tih a chiang tih sawiin Dr. Pachuau Lalmalsawma chuan, Variant chhuak thar zingah Eta Variant chu a hlauhawm bik lehzual tih a sawi a, hri kai zinga 69% chu ICU a enkawl ngai an ni thin tih a sawi a. Delta Variant hi khawvel ram tinah a awm tawh tih sawiin, Alpha Variant hi ram 175 ah hmuhchhuah tawh a nih thu leh Eta Variant hi ram 67 ah hmuhchhuah a nih tawh thu a sawi a. Zirchianna neih tawh chinah Delta Variant kai zinga 0.1% in nunna an chan thu leh Alpha Variant kai zinga 2% leh Eta Variant kai zinga 2.7% in nunna an chan thu a sawi bawk.

Mizoram-ah pawh District hrang hrangah heng hrik thar hi a awm theih tawh thu sawiin, mipuite chu fimkhur lehzual turin an ngen a, COVID-19 hri laka invenna tura sawrkarin inkaihhruaina a duante chu uluk taka zawm turin a chah bawk.

Whole Genome Sequencing tura Mizo-ram atanga sample thawn tawh dan pawh sawiin State Nodal Officer & Official Spokesperson on COVID-19 chuan, March, 2021-ah Sample 69 thawn niin Variant thar hmuh a nih loh thu te, April, 2021-ah Sample 217 thawnin Deta Variant 4 hmuh a nih thu te, June, 2021-ah Sample 100 thawn niin Delta Variant 73, Alpha Variant pakhat leh Eta Variant pakhat hmuh a nih thu te a sawi a, July 15, 2021-ah Sample 150 thawn chu result hriat ala ni lo tih a sawi a. Whole Genome Sequencing tur hian National Institute of Biomedical Genomics (NIBMG), Kalyani, West Bengal-ah Sample te hi thawn a ni tih sawiin, Sample thawnna hmun, NIBMG, Kalyani, West Bengal chu India hmarchhak State 8 in kan intawm avangin Sample Test hian hun a duh rei deuh thin thu leh result kan hriat har deuh thin thu a sawi bawk.

Serchhip District mi la hre lo :

Sechhip District Surveillance Officer, Dr. Lalhlunpuii chuan Serchhip District atanga COVID-19 hri kai hmuhchhuah zinga Delta Variant te hi tu te nge an hre lo tih nimin tlai khan LENKAWL a hrilh a. Sample enfiah tura thawn te hi Serchhip atanga lak an nih loh thu leh ZMC lama hri kai enkawl tura an thawn atanga an Sample lo lak a ni tih a sawi bawk. Hetihlai hian Sample enfiah te hi a thawnna a rei tawh deuh avangin Delta Variant hmuhna te hi an dam tawh a rinawm tih thudawnna pakhat chuan a sawi bawk.