Ramri-a buaina chungchangah State pahnih Chief Secretary ten New Delhi-ah inbiakna an nei

Zonuna Kawlni /

Assam Police ten July 26, 2021 (Thawhtanni) a Mizoram rawn luta buaina an siam vanga State pahnih inkara harsatna awmte sukiang turin nimin khan State pahnih Chief Secretary te chuan inbiakna an nei a, Mizoram leh Assam inrina NH. 306-ah Central Armed Police Forces (CAPF) duty chhunzawm turin remtih a ni.

Union Home Secretary Ajay Kumar Bhalla-a kaihhruaina hnuaiah Mizoram Chief Secretary Lalnunmawia Chuaungo leh Assam Chief Secretary Jishnu Barua te chuan nimin chawhma lam khan North Block, New Delhi-ah inbiakna hi an nei a, he hunah hian tuna Mizoram Police awm mekna a CAPF te awm tir tura nawrna nasa tak a awm avangin inremna an neih theih loh avangin tlai dar 4:30 khan an indawr chhunzawm leh a ni a. Ministry of Home Affairs leh Assam Chief Secretary ten nasa taka Vairengte Auto Rickshaw Stand atanga Mizoram Police te tawlhsawn turin nawr chhunzawm mahse, Mizoram Chief Secretary Lalnunmawia Chuaungo chuan nasa taka hnial leh dodalin, Mizoram sawrkar leh Mizoram mipuite duhdan a nih loh thu leh an tawlhsawn nachhan tur an hriat loh thu sawiin a tang tlat thung a ni.

Hun engemaw chen Chief Secretary te hian inbiakna an neih hnuah Mizoram leh Assam inrina, NH. 306-ah Central Armed Police Forces (CAPF) duty chhunzawm turin remtih a ni a, CAPF Senior Officer-in a hmunah a thutchilh dawn a ni. Hei bakah hian Mizoram leh Assam sawrkar chuan CAPF duty ten tha taka hna an thawh theihnan sawrkar laipui-a Ministry of Home Affairs rawn chunga ruahmanna felfai tak siam an remti a, ramri buaina chingfel turin zai ngai tawn tak chung leh harsatna dang siam lova inbiak chhunzawm zel an remti bawk a ni.

Nimin-a inbiakna ah hian Mizoram Chief Secretary hi Mizoram DGP, SBK. Singh chuan tawiawmin Chief Secretary chuan Assam in Mizoram luhna kawngpui an dan chah (Road Blockade) bakah Rel kawng an tihchhiat avanga ei leh bar lakluh kawnga harsatna kan tawh thu Union Home Secretary hnenah hian thlen nghal a, a rang lama chingfel turin Home Secretary hi a ngen nghal bawk a ni.

Comments

Post a Comment

Popular News (Last 30 Days)

C&I Minister in hmanpui

Zonuna Kawlni /
Commerce & Industries Minister F. Roding-liana chuan nimin khan Industrial Growth Centre, Luangmual-ah ZOPA Concrete Block Industry hawnna hun hmanpuiin Industry la din zel turte pawh sawrkar chuan puih a huam reng tih a sawi a. Mizote’n kan ramchhunga siam, kan mamawh em em, Mizo siam dik tak Cubic lung kan ban phaka a awm tawh tur chu a ropui hle tih sawiin, hlawhtling tur chuan taimakna leh tih tak takna rilru neih a tul thu a sawi bawk.
Kimchang zawkin »