Chanchin thar thenkhat :

Sawrkar in SOP siamtha

Mizoram sawrkar chuan Mizoram pawnlam atanga rawn lut te Entry Point-a COVID-19 Test kalpui dan tur a siam thar a, hei hi hman nghal tur a ni ang. Ruahmanna thar ang chuan State pawnlam atanga rawn lut turte hi Mizoram an lo luhna (Point of Entry)-ah RAgT (Rapid Antigen Test) hmanga en dik vek an ni ang a, hri kai te chu a hmaa enkawl dan anga enkawl zui tur niin hri kai lo te erawh chu In-ah emaw, CQF/Paid Hotel-ah ni 7-10 chhung an inkhung hrang tur a ni a, ni 7-10 hnuah RT-PCR a test tur niin Negative result an neih chuan inkhung zui a ngai lo anga, ni 7 chhung fimkhur takin mahni an inchik zui ang. He inkhunghran chhunga taksa-a hri kai lanchhuahna an neih chuan ni 7-10 thleng lo mah se RT-PCR/TrueNat hmangin a rang thei ang bera test tur a ni ang.

Sampe enfiah runpui nei

Ruahmanna lo siam lawk tawh angin nimin khan AMC huamchhunga khua/Veng 6- Tuirial, Bethlehem Vengthlang, Armed Veng South, Chhinga Veng, Saron Veng leh Electric Veng-ah te Sample enfiah runpui neih a ni a, hriat theih chinah hri kai 111 hmuh an ni.

Mamit Hospital khar rih dawn

Mamit District Hospital-a Doctor pakhat chu COVID-19 a kai tih nizan hmasa khan hmuh-chhuah niin Doctor dang 4 leh Staff thenkhat chu a kawmhnaih zingah an tel avangin Mamit District Hospital hi nimin atanga ni 3 chhung khar rih a ni dawn a, OPD pawh khar rih tur niin emergency-ah chiah damdawi In hi pan theih a ni ang.

MPCC in tanrual a ngai ti

Mizoram Pradesh Congress Committee (MPCC) Media Department chuan nimin khan thuchhuah siamin Mizoram leh Assam ramri buaina kan hmachhawn mekah Mizoram mipui kan tanrual a ngai hle tih tarlangin, Sawrkar tha ti chak turin theihtawp kan chhuah a ngai tih an tarlang bawk.