Mizoram-ah hri kai 417 hmuh belh leh an ni

Niminpiah khan Mizoram-ah Sample 3235 enfiah leh niin heng atang hian COVID-19 hri kai mi 417 hmuhchhuah leh an ni a, Sample enfiah atanga za zela 12.89 te chuan hri an kai ang niin hri kai hmuhchhuah thar ah hian June 24-a TNT Centre-a hri kai hmuhchhuah tawh 212 te an tel bawk a ni.

Niminpiah khan ZMC Laboratory-ah Sample 985 enfiah niin heng atang hian hri kai mi 147 hmuhchhuah an ni a, heng zinga 146 te hi Aizawl District-a Sample lak niin midang pakhat hi Serchhip District-a Sample lak a ni thung. Aizawl District-ah hian Veng/khua khat atanga hri kai 10 aia tam hmuhna 5 lai ala awm a, heng te hi Sairang Dinthar, Armed Veng, Armed Veng South, Saron Veng leh Chhinga Veng te niin inkhunghrang lai deuh vek an ni thung.

District hrang hranga TrueNat Laboratory 8-ah Sample 266 enfiah ni bawkin heng atang hian hri kai mi 12 hmuhchhuah an ni a, heng hri kai hmuhchhuah zinga 9 te hi Lunglei District ami niin Lunglei khawpui chhunga mi 8 leh Chawngte-a mi pakhat an ni a, Mamit District-ah hri kai mi 3 hmuh an awm bawk.

Rapid Antigen Test hmangin niminpiah khan Mizoram-ah Sample 1984 enfiah ni bawkin hri kai 258 zet chhinchhiah thar an awm a, heng zinga 212 te hi Aizawl District ami niin an zingah hian June 24-a TNT-a hri kai hmuhchhuah tawh 127 telin Venghlui-ah mi 16 leh Bawng-kawn-ah mi 10 an awm a, Central Jail-ah hri kai mi 8 hmuh an ni bawk. Heng bakah hian Siaha District-ah hri kai mi 24 hmuh an ni a, Kolasib District leh Mamit District-ah mi 7 ve ve, Lunglei leh Lawngtlai District-ah mi 3 ve ve leh Champhai leh Serchhip District-ah hri kai pakhat ve ve hmuh an ni bawk.

Heti hian nimin thlenga Mizoram-a COVID-19 hri kai hmuh tawh chu 20,492 an tling tawh a, nimin khan hri kai mi 357 te chu hri lakah fihlimin anmahni enkawlna hmun atanga chhuahtir an ni ve leh a. Heng te nen hian Mizoram-a hri kai enkawl dam chu mi 16,545 ni tawhin hei hi hri kai hmuhchhuah atanga chhutin za zela 80.73 a ni a, tunah hian hri kai enkawllai 3854 an la awm mek a, hri kai zingah mi 93 an boral tawh bawk a ni.

Integrated Disease Surveillance Project (IDSP) chhinchhiahna atanga a lan danin kumin January atanga June thla tawp, kum chanve chhung khan Mizoram-ah Sample 3,06,756 enfiah niin heng atang hian COVID-19 hri kai 16,276 hmuhchhuah ni tawhin hri kai mi 11,981 te enkawl dam an ni tawh a, hri kai zingah mi 85 an boral tawh a ni. June thla chhung khan hri kai 8093 hmuhchhuah niin mi 6974 enkawl dam an ni a, hri kai mi 53 an boral bawk a ni.