Latest News

Lunglei-a RT-PCR Laboratory dah a remchang rihlo

RT-PCR Lab for Chhimbial-in Lunglei-a RT-PCR khawl bun chungchanga High Court-a an zualkona kal zelah Mizoram sawrkarin tun dinhmunah Civil Hospital, Lunglei-a RT-PCR Laboratory dah chu a remchan loh thu leh Lunglei District tan RT-PCR Laboratory mamawhna a awm loh thu High Court a hrilh.

Tunkar Thawhtanni khan biak hmuh theihna kaltlangin Gauhati High Court Aizawl Division-ah he PIL chungchang hi Justice Michael Zothankhuma leh Justice Nelson Sailo te awmna chuan ngaihtuahin, PIL thehluttute aiawhin JC. Lalnunsanga a ding a, Mizoram sawrkar aiawhin D. Das, Advocate General leh AD. Choudhury, Addl. Advocate General te an ding thung a. Mizoram sawrkar aiawha ding Advocate General chuan RT-PCR khawl enkawl tur hian Micro-Biologist pahnih mamawh anih thu Court-ah a thlen a. High Court in building sak zawh anih hmaa RT-PCR Laboratory atana lo hman lailawk tur building lo enfiah a, lo tichiang tura a tih leh thurawn a pek chu engmah sawilan emaw, sawichianna emaw a nei lo thung.

Advocate General in Affidavit a thehluhah tun dinhmunah Civil Hospital, Lunglei-a RT-PCR Laboratory dah hi a remchan loh bakah, tun dinhmunah Lunglei District tan RT-PCR laboratory mamawhna a awm loh thu High Court a hrilh a. Tuna hman mek TrueNat khawl te hian Mizoram chhim lam District pali (4) te mamawhna a phuhruk thu leh COVID-19 hri kai enfiahna atan a that tawk thu a hrilh bawk.

Advocate General hian Cabinet in July 1, 2020-a hemi chungchanga thutlukna leh Press Note 27.6.2020 te thehluh leh a dilna chu Court chuan a phalsak a. Additional affidavit-ah chuan TrueNAT khawl enkawl tura Micro-Biologist a mamawh zat te, ICMR in Zoram Medical College (ZMC) a RT-PCR Laboratory din a phalsakna lehkha copy bakah, June 15, 2020-a Mizoram sawrkar-in Civil Hospital, Lunglei endik tura Expert Team te endikna lehkha te thehlut turin a ti a ni.

Advocate General sawi danin, Mizoram sawrkar hian NEC emaw, Ministry of Tribal Affairs hnen atangin emaw Laboratory Building mal din sakna tur a la dawng lova. He building mal din sak thar turah hian RT-PCR khawl dah a nih tur thu leh a sakna tur chu state sawrkar sum hman tura tih a ni.

Thubuai thehluttu aiawha ding JC. Lalnunsanga chuan state sawrkar aiawh lamin Affidavit an thehluh chhanna tur Court a dilna chu phalsak a ni a. Lunglei leh District dangte a COVID-19 hri kai enfiah dan khaikhinna tarlang tura tih ni bawkin July 19, 2021 emaw, a aia hma emaw a heng affidavit te hi thehlut tura tih a ni a, he PIL hi tun thla ni 22 khian ngaihtuah leh tura ruahman a ni.

Comments

Chhiar Hlawhte