F&ES Department hnenah kangthelh Motor 3 hlan

Disaster Management and Rehabilitation (DM&R) Minister, Lalchamliana chuan kangthelh motor tha chi, High Pressure Pump Fire Tender pathum chu a tul hun apianga hman theih turin nimin khan Fire & Emergency Services Department hnenah a hlan.

Heng Motor inhlanna hun hi nimin khan MINECO Zero Point tual-ah neih niin heng Fire Tender pathumte hi State Disaster Management Authority (SDMA) phalna in Rs.1,39,50,000 seng-a lei a ni a. DM&R changtu Minister, Lalchamliana chuan Kangthelh Motor tha chi High Pressure Pump Fire Tender pathum zet lei a ni ta chu lawmawm a tih thu a sawi rualin, kangthelh tur awm lo se tih chu a mimal duhthusam a ni, tih a sawi a. Kumin April ni 14 atanga chawlhkar khat chhung Fire Safety Week hman a nih hnuah ringawt pawh Mizoram chhung hmun 49 vel zetah ram kan avangin harsatna kan tawk hman tih sawiin, Kangmei chhuak avanga chhiatna thleng tam zawk hi mihringten kan thlen chawp a nih thin avangin mitin te kan fimkhur a tul hle a ni, a ti bawk.

High Pressure Pump Fire Tender pathumte hi Restricted Tender kaltlangin Sova-High Tech Industries, Guwahati atanga lei a ni a. TATA 712 LPT Chassis niin tui litre 3500 a phur thei a. A tui phuh nat zawng hi 1cm bial-a kg 7-a rit-a den ang a ni a, minute 1-ah litre 2000 a phuh thei a ni. SDMA in a rel angin Mizoram luhka- Vairengte, Bairabi leh Kanhmun atanga chakkhai phur motor lian rawn lutte disinfectant hmanga phuhna atan leh tul danga hman theih tura ruahman a ni.