Mizoram-ah hri kai sing hnih aiin an tam tawh

Niminpiah-a Mizoram-a Sample enfiah 3534 atangin COVID-19 hri kai mi 256 hmuhchhuah leh niin Mizoram-a COVID-19 hri kai hmuhchhuah chu mi sing hnih aiin an tam ta.

Niminpiah khan ZMC Laboratory-ah Sample 948 enfiah niin heng atang hian COVID-19 hri kai 75 hmuh an ni a, an vai hian Aizawl District-a Sample lak vek an ni a, Aizawl Saron Veng-ah hri kai mi 12 lai hmuhchhuah leh niin Falkland-ah hri kai mi 10 hmuhchhuah an ni bawk a, hri kai tawh nen inkawmhnaihna nei leh State pawn atanga rawn lut te niin inkhunghranna hmuna awm te an ni.

District hrang hranga TrueNat Laboratory-ah niminpiah khan Sample 287 enfiah niin heng atang hian COVID-19 hri kai mi 8 hmuh an ni a, an zinga mi 6 te chu Lunglei District-a hri kai hmuhchhuah niin Serchhip leh Hnahthial District-ah hri kai pakhat ve ve hmuh an ni bawk.

Rapid Antigen Test hmangin niminpiah khan Mizoram-ah Sample 2299 enfiah ni bawkin heng atang hian hri kai mi 173 hmuh an ni a, heng zinga 79 te chu Aizawl District ami te niin Chhinga Veng-ah hri kai mi 14 zet hmuh an awm a, hri kaina hriatloh leh chhui ngai te an ni a, midang 42 te pawh hri kaina hriatloh leh chhui zui ngai an ni bawk. Kolasib District-ah hri kai mi 50 zet hmuhchhuah an ni a, Kolasib Thutak Nunpuitu Team Camping Centre-ah hri kai mi 4 hmuh an ni a, Kolasib Veng hrang hrangah hri kai 29 lai hmuh an ni bawk. Lawngtlai District-ah hri kai mi 17 hmuh niin Kamalanagar leh Chawngte ami vek niin an vai hian hri kaina hriatloh leh chhui ngai an ni a, Champhai District-ah hri kai mi 9 hmuh niin tunhnaia Mizoram pawn atanga rawn lut an ni a. Lunglei District-ah hri kai mi 7 hmuh niin Siaha leh Mamit District-ah 5 ve ve leh Saitual District-ah hri kai mi pakhat hmuh an ni bawk.

Nimin thlenga Mizoram-a COVID-19 hri kai hmuh chu 20,075 an ni ta a, nimin khan hri kai mi 676 te chu enkawl dam leh nikhat-a hri kai enkawl dam an tam ber ni a ni a, an zingah hian TNT Camp-a awm mi 527 zet an tel a. Tun thlenga Mizoram-a hri kai enkawl dam chu 16,18 ni tawhin, hei hi hri kai hmuhchhuah atangin za zela 80.63 a ni a, tunah hian hri kai enkawllai 3794 an la awm mek a ni.

Mizoram-a hri kai zinga mi 93 zet an boral tawh :

Mizoram-a COVID-19 hri kai zingah mi 93 zet an boral tawh. Nimin chhun dar 1:10 khan Lalchhanhimi (31), Vairengte chu ZMC-ah COVID-19 vangin a boral a, June 23-a hri kai hmuhchhuah niin hemi ni vek hian ZMC-ah dahluh a ni a, nimin khan a boral zui ta a ni. Heti hian nimin thleng khan Mizoram-a COVID-19 hri kai zingah mi 93 lai an boral ta a, June thla chhung khan mi 53 lai boralin June 12, 27 leh 29 tihloh ah nitin hri kai boral an awm bawk a ni.