MJA Kolasib District member ten Assam leh Mizoram inrina Buarchep phai an tlawh

Mizoram Journalists' Association (MJA) Kolasib District Member te chuan tunhnaia Assam Sawrkar in Mizo Leilet a nawrchhiat sakna hmun Buarchep, Phainuam bul chu nimin khan an tlawh.

Nimin a helai hmun tlawhtu MJA Kolasib District Member te hi CS. Lalrinzuala, Assistant Commandant, 5th IR Battalion chuan lo dawngsawngin, an dinhmun tlangpui te a lo hrilhfiah a. Tun dinhmunah buaina a awmloh thu sawiin, a tirah chawpchilh takin an riahna tur sak ni mahse Puan In (Tent) an hman tur a lo thlen thu te, Power Department lamin Current an thlunluh sak tawh thu te a sawi a. Duty post tur an buaipui mek thu a sawi bawk.

Assam lam hian Saihapui lui thlengin kawng an rawn lai tawh a. Kawng an laih hi hman tlak turin an cheibawl nghal zel a, Saihapui lui kam-ah hian Duty post an siam tawh bawk a. An Police te hi ADGP in a ho reng thu te, DC leh SP te pawhin an tlawh reng thu a sawi bawk a. Buarchep khaw mite sawi danin Assam in kawng an laih chin ah hian Mizo pahnih ten leilet an nei a, hei hi tun dinhmunah chuan an enkawl zel thei dawn em tih a chiang lo a ni.

Mizoram Police te duty-na hmun hi Buarchep atangin ke a kal ngai a ni a, a panna kawng hi MLA Fund hmangin laih ni tawh mahse tun dinhmunah hman tlak a nih loh avangin JCB pahnih hmangin kawng hran hi laih leh mek a ni a, ruahtui a tlak tawh avangin hna erawh an thawk chak theilo thung a ni. Tuna Mizoram Police te inkulh mekna hmun chhak tlang-ah hian Police Duty post nghet siam tumin hmalak mek a ni a. A hmun hma tur hi JCB hmanga laih mek a ni bawk.

MJA Kolasib District chuan ramri a duty te zan engemawzat buk zar chawp-a awm an ngai chu Home Department lam chak tawkloh vangah an ngai tih an sawi a. Fur ruahsur karah, Thosi leh Vangvat karah ramhnuaia buk mumallo-a an awm a, a tir atanga Tent ken tur an nei nghal lo te, Generator inchhawp tur an nei lo te, a bul khaw mipuite hnatlan ngai a ni leh thin te chu engemaw buaina chhuak palh thei laka him tawklo ah an ngai tih an sawi a. Ramri hmun hrang hranga buaina chhuaka Police lutte riahna tur District Administration atanga Silpauline ngaihtuah chawp sak a, an awmna tur hnawhsa rum-a khawtlang hnatlang a sak sak ngai lo tur hian Sawrkar hian Police te hi thuam chak se an duh tih an sawi bawk.