Agri. Department hmalakna in Zawngtah tiak sem

Serchhip-a Agriculture Department chuan Sub-Mission on Agroforestry (NMSA) Small Nursery atangin nimin khan Zawngtah tiak 9050 an semchhuak.

Thenzawl a Obing Zau atanga Zawngtah tiak semna hunah hian Serchhip DAO, Tlangtimawia Zote chuan Sub-Mission on Agroforestry hi Serchhip District hmun thum-a buatsaih tura tih anih thu sawiin, thlai tiak te chu nakum-a semchhuah tan tura tih anih laiin thawktute inpekna leh thahnemngaihna zarah a hun aia hmaa sem chhuah a nih tak thu a sawi a. Loneituten Zawngtah tiak an dawnte chu tha taka phun nunga, ramngaw siam nan leh sum thawhchhuahna atana tangkai taka an hman theih ngei a duhsak thu a sawi a ni.

He hun kaihruaitu Serchhip District FOCUS-a District Project Manager (DPM), K. Laltlanmawia chuan  loneitute hnenah a thlawna thlai tiak sem leh chumi hmanga an sum lakluh tihpun chu Sub-Mission on Agroforestry in a tum bulpui ber a nih thu a sawi a. He hunah hian T. Lalremruata, G/S, Nursery Incharge chuan thlai tiak semchhuah anih dan report a pe in; Thenzawl-ah 4900, Kanghmun South-ah 1710, Neihloh-ah 890 leh Zote South-ah 1550, a vaiin Zawngtah tiak 9050 chu chhungkaw 223 hnenah sem chhuah a ni tih a sawi a. Khaw tina FIG ten a tul angin an lo buaipui zui dawn a ni.