Latest News

Inkaihhruaina hman zui tur

Serchhip District Bawrhsap Kumar Abhishek chuan nimin khan thupek tichhuakin COVID-19 hri leng hluar zel laka mipuite him theihna tura tun thla ni 2-a inkaihhruaina thupek lo tihchhuah tawh chu Oct. 17, 2021 atanga Oct. 30, 2021 zanlai dar 12:00 thleng Serchhip District-ah hman chhunzawm tur a nih thu a tarlang.

Mizoram-ah hri kai hmuhchhuah an la pung zel

Mizoram-ah COVID-19 hri kai hmuhchhuah an la pung zel a, Inrinni-a Sample enfiah 4084 atangin hri kai mi 442 zet hmuhchhuah leh niin Mizoram-a hri kai hmuhchhuah chu 23,993 zet an tling tawh.

Inrinni khan ZMC Laboratory-ah Sample 1216 enfiah leh niin heng atang hian hri kai 36 hmuhchhuah an ni a, an vai hian Aizawl District-a Sample lak vek niin Veng khat atanga hri kai hmuhchhuah tam lutuk an awm lova, hri kai hmuhchhuah zinga mi 34 te hi hri kai tawh nen inkawmhnaihna neih avanga inkhunghrang niin midang 2 hi State pawn atanga rawn lut leh inkhunghrang lai an ni thung.

District hrang hranga TrueNat Laboratory-ah Inrinni khan Sample 403 enfiah niin heng atang hian hri mi 53 hmuhchhuah an awm a, heng zinga 24 te chu Kolasib District ami te niin Lunglei District-ah hri kai 23 hmuh an awm a, Lawngtlai District-ah hri kai mi 6 hmuh an ni bawk.

Inrinni khan Rapid Antigen Test hmangin Sample 2465 enfiah ni bawkin hri kai mi 353 hmuh an ni a, an zinga 217 te chu Aizawl District ami niin Sairang Dawr Veng-ah hri kai mi 26 hmuh an ni a, Bawngkawn leh Zemabawk North-ah mi 14 ve ve hmuh niin Bethlehem Vengthlang, Chhinga Veng leh Laipuitlang-ah mi 12 theuh hmuh an ni bawk. Lunglei District-ah hri kai mi 42 hmuh an awm bawk a, an zinga pakhat tihloh chu Lunglei khawpui chhung ami vek an ni. Kolasib District-ah hri kai mi 40 hmuh niin an zinga 22 te chu Hortoki khua an ni a, Mamit District-ah hri kai mi 35 hmuh niin Dapchhuah-ah mi 20 leh Zawlpui-ah 14 hmuh an ni. Heng bakah hian Lawngtlai District-ah hri kai mi 9 hmuh niin Champhai leh Khawzawl District-ah 3 ve ve leh Siaha leh Saitual District-ah hri kai mi 2 ve ve hmuh an ni bawk.

Mizoram-a COVID-19 hri kai hmuhchhuah chu 23,995 an tling ta a, nimin khan mi 231 te chu enkawl dam leh niin hri kai enkawl dam hi 19,618 an tling ta a, hei hi hri kai hmuhchhuah atangin zaa 81.75 niin hri kai enkawllai 4269 an la awm mek a ni.

Mizoram-a hri kai zingah mi 108 an boral tawh :

Mizoram-a COVID-19 hri kai zingah mi 108 zet boral an awm tawh. Sawrkar thupuan in a tarlan danin Inrinni tlai dar 5:00 khan PC. Thangpuia (80), Chawngte ‘L’ chu ZMC-ah boralin Inrinni zan dar 7:00 khan Vanhnuailiana (51), Ramthar Veng Aizawl chu ZMC-ah a boral ve leh bawk, hemi hnu zan dar 7:30 velah Saibawii (89), College Veng Aizawl chu an chenna In-ah COVID-19 vangin a boral bawk. Nimin zing dar 7:00 khan Zaihmingthanga (31), Maubawk chu ZMC-ah hian boralin C. Lalliana (80), Mission Veng chu nimin zing dar 8:10 khan an chenna In-ah a boral a, RAgT hmanga a Sample enfiah a nih hnuah hri a kai tih hmuhchhuah a ni bawk.

Comments

Chhiar Hlawhte