Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Kumin ah Cyber Crime thubuai 10 awm tawh

Mizoram Police CID (Crime) chuan kum 2009 atang khan thubuai ziaklut tanin kumin hian kum chanve chhungin thubuai 10 ziahluh an nei tawh.

Thudawn danin Mizoram Police-a CID (Crime) hian Cyber Crime kaihhnawihah kum 2009-ah thubuai ziaklut tanin hemi kum hian thubuai pahnih ziahluh a ni a, kum 2010-ah thubuai 3 ziaklutin, kum 2011-ah 5, kum 2012-ah 4 leh kum 2013-ah 9 an ziaklut a, kum 2014-ah phei chuan thubuai 28 zet ziaklutin thubuai ziahluh tam ber kum ala ni a, hetiang hian kumtin thubuai ziahluh awm belh zelin kumin hian kum chanve (January - June) chhungin thubuai 10 ziahluh a ni tawh bawk a. Thubuai ziahluh zinga a tam ber chu Social Media-a thu post kaihhnawiha Police-in complaint an dawn atangin a ni.

Thudawn danin, Mizoram-a Cyber Crime thubuai ziahluh hmasak ber hi May 20, 2009 khan thlengin, Reverend pakhat chuan SP Aizawl hnenah FIR a submit a. He FIR-a a lan dan chuan mi tu tih hriat loh ten a Email Password (HOTMAIL) chu lo thlak sakin, a Email Account hmang chuan a thian hrang hrang mi engemaw zat hnenah; amah chu London a zina, a wallet ti bo vek leh Hotel Bill pawh pek tur nei tawh lo anga in sawiin, pawisa US Dollar 2500 chu Western Union kaltlanga puk tir turin an lo dil tih a hrechhuak a, hemi chungchangah hian action la turin Police hnenah a thlen a ni. He thilsual tih tumtu te hi Foreigners (Nigerian) lam mi ni a hriat an ni nghe nghe a ni.

May 21, 2014 khan Mizoram Police, SP CID (Crime) hnuaiah Cyber Crime Investigation Cell din a lo ni tawh a, hun engemaw chen Cell anga kalpui a nih hnuin tunah chuan Police Station puitling ah hlankai ni tawhin, Police Headquarters, Khatla, Aizawl-ah Cyber Crime Police Station hi 27.11.2020 khan hawn a ni a. Cyber Crime Police Station-ah hian thawktu mi 8 awmin Dy. SP chu Officer-In-Charge niin, Inspector 1, Sub-Inspector 2 leh Asst. Sub-Inspector 1 te chu Investigating Officer an ni. Heng te bakah hian thawktu dang Head Constable 1, Constable 1 leh IV Grade 1 an awm bawk a. He Police Station hian Mizoram pum huapin thuneihna a nei a, tupawh Cyber Crime lama harsatna nei chuan englai pawhin lungawilohna an thehlut thei reng a ni tih Police hotute chuan an sawi a ni.

Cyber Crime Police Station-a thawktute chuan Cyber Crime leh IT thubuai awm thei laka fimkhurna tur thuchhuah an tichhuak fo thin a, tunhnai a thuchhuah an siam ah, inbumna chi khat, Sextortion a hluar thar thu leh chumi laka mipuite himna turin Facebook/Instagram etc. ah hriatchian loh te Friend Request Accept loh a pawimawh thu te, number hriatloh emaw atanga Video Call Pick up loh a tul thu te an tarlang.

Comments

Chhiar Hlawhte