Latest News

Chanchin thar thenkhat :

Kargil Vijay Diwas hmang

Nimin July 26, 2021 kha India sipai ten Kargil Indona-a Pakistan an hnehna ni champha vawi 22-na a ni a, he ni pual hian Kargil indonna hmuna India sipai huaisen Martar te hriatrengna leh zahna lantirna hun chu Mizoram Governor Dr. Haribabu Kambhampati hovin War Memorial, Zodin Square-ah leh Quarter Guard (Unit HQ 2 Assam Rifles, Lakhimpur Bn)-ah te hman a ni. Kargil Vijay Diwas 2021 puala hun hmasa zawk hi War Memorial, Zodin Square-ah neih niin Kargil Indona hmuna sipai huaisen ram chhanna atana nunna hlantute zahna lantir nan Governor hian Pangpar (Wreath) dahin Martarte zahna chibai a buk a ni.

Hemi hnu hian Governor chuan Quarter Guard chhungte fang kualin AR hotuten Quarter Guard chanchin leh a kaihhnawih te bakah India Sipai huaisen te thiltih langsar deuh Quarter Guard chhunga tarlan te an lo sawifiah a ni. Kargil Vijay Diwas hi kumtin India ram pumah hman thin a ni a. July 26, 1999-a India Sipai ten Kargil tlang chhip-a Ralvenbuk te Pakistan Sipai te lak atanga an lakletna leh hnehna an chan hriat-rengna atan hman thin a ni.


Cocoon hralhchhuak tan

Hnahthial District chhunga Pangang khawi-tute chuan kumin (2021) atan a vawi 3-na atan nimin atang khan an tharchhuah Cocoon te chu Sericulture Department-ah an hralh tan a. Hnah-thial District chhungah hian Pangang khawi chhungkua 160 awm mekin chhungkaw 5 te chuan Muga (Nauthak) Pangang an vulh a, chhungkaw 155 te hian Mulberry Pangang an vulh bawk a ni. Nimin-a Sericulture Department-in a lei sak te hi Model Veng leh Rotlang East atanga chhung-kaw 4 tharchhuah Mulberry Pangang niin a vaiin kg. 52 a ni a, kg khat hi Rs. 300/- zelin lei sak an ni. Hnahthial-a Pangang khawitute hnenah hian a chi leh In sakna bakah damdawi leh hmanraw hrang hrang a thlawn veka pek niin kum khatah vawi 4 a Cocoon thin a ni.


Ramri-ah Venbuk sak rel

Joint Action Committee on Inner Line Reserved Forest Demand, Aizawl leh Vairengte Thalai Pawl chuan Inrinni khan Joint Meeting neiin ramri hrul khua leh tui te an lo him zel theih nan Venbuk sak nise an ti a, a sak dan tur leh ruangâm pawh a rang thei ang bera buatsaih nise an ti bawk. Hei bakah hian Mizoram sawrkar chu kan ram, 509 Sq. Miles, Inner Line Reserved Forest venghimtu tur Forest Protection squad chak tak dah belh tura an duh thu sawiin, Mizoram leh Mizo hnam venghim tur in Armed Police Force lakbelh tura an duh thu an sawi a. Mizoram sawrkar in District Level Border Management Board a din chu State Level zawk, Border Dispute Area Development Board in tihlen an duh thu an sawi bawk.


MZP in Vairengte an pan

MZP General Hqrs. hruaitute chuan nimin khan Assam Police ten buaina an siamna hmun chu an pan nghal. MZP General Hqrs. hian nimin khan thutkhawm hmanhmawh neiin Assam Police ten ralthuam famkim inthuam a, Mizoram chhunga Mizo mipuite rikrapa buaina an siam chu thinurthlak an ti tih sawiin, Mizoram IR Camp luhchhuaha Assam Police ten an luah chhun-zawm pawh mak an tih thu leh pawm harsa an tih thu an sawi a. Assam miten Mizo mipuite thamlo taka min luhchilh leh kan ram chhunga huangtau taka ralthuam nen an rawn che hi chhan let ve a hun tawh takzet nia an hriat thu sawiin, Ram humhalh kawnga Mizoram sawrkar hma-lakna chu an duhkhawp lo takzet tih an sawi a. “Mizoram sawrkarin Assam sawrkar a ngam lo a nih chuan, Mizo thalaite an che chhuak zel dawn,” an ti bawk.

MZP General Hqrs. hruaitute hian nimin vek khan an President, B. Vanlaltana hovin Assam Police ten buaina an siamna hmun, Vairengte hi an pan nghal a ni.


MSU in bang turin an ngen

Mizo Students’ Union (MSU) General Hqrs. chuan ramri buaina hi an chingfel thei lo a nih chuan kan Chief Minister leh Home Minister chu bang ngam turin an ngen. Nimin a thu-chhuah an siamah MSU General Hqrs. chuan Mizoram leh Assam ramri chinfel loha awm reng chu pawi an tih thu sawiin, Mizoram sawrkar chu Mizo mipui duhdan anga che vat tura an phut thu an sawi a. “Ramri buaina hi an ching fel theilo a nih chuan kan Chief Minister leh Home Minister chu bang ngam turin MSU chuan a ngen a ni,” an ti a. Assam Police ten Mizo Police te Camp an lâk zawng zawng chu rang taka la let nghal tura Mizoram sawrkar ngenin, hei hi a thei lo a nih chuan zirlaite chu kan ram chin lalet turin an pên chhuak dawn tih an sawi bawk.

Comments

Chhiar Hlawhte