TKP dinchampha hmang

Baptist Church of Mizoram (BCM) hnuaia thalai pawl, Thalai Kristian Pawl (TKP) chuan nimin khan an dinchampha vawi 70-na an hmang.

TKP Day hi ripui leng avangin Unit hrang hrang ten kumdang angin an hmang thei lova, he ni pual hian Unit tin ten mahni Biak In-ah kum 70 tlin lawmna leh Pathian hnena lawmthu sawina dar vawi 70 theuh vuain thupui atan 'Lalpa lam I hawi ang u' (Tah Hla 3:40) tih chu hman a ni bawk.

July 30, 1951 khan Serkawn-a thalai then-khat leh Kohhran Hruaitu Upa te chuan Zosap Missionary-te duhsakna leh kaihhruaina hnuaiah Thalai Kristian Pawl hi an din a, R. Lungruala chu President hmasa ber a ni bawk. Mizoram Thalai Kristian Pawl (MTKP) hian Pastor Bial 88-ah Unit TKP 420 a nei mek a, tun dinhmunah Member 44,228 awmin mipa 27,292 leh hmei-chhia 16,936 an ni a. Kum 2020 chhung khan Kohhran Dan puitlingin tuak 436 inneiin, Dante in tuak 311 innei an awm bawk.