Mizoram-ah hri kai 519 hmuhchhuah belh leh an ni

Niminpiah khan Mizoram-ah Sample 5304 enfiah niin heng atang hian COVID-19 hri kai 519 hmuhchhuah leh an ni a, Mizoram-a hri kai hmuhchhuah chu 24,702 zet an tling tawh a ni.

Niminpiah khan ZMC Laboratory-ah Sample 1813 enfiah niin heng atang hian hri kai 182 hmuh niin ZMC Laboratory-a ni khat-a hri kai hmuhchhuah an tam ber tum a ni a, an vai hian Aizawl District-a Sample lak vek niin hri kai zinga mi 40 te chu Aizawl Chanmari West ami an ni a, Venghlui-ah hri kai mi 27 hmuh niin Thuampui-ah 16, Ramhlun South-ah 13 hmuh niin a bak hi Veng hrang hrang 28 leh khawdang atanga Aizawl-a kal te an ni a, hri kaina hriatloh leh chhui ngai thahnem tak an awm bawk a ni.

District hrang hranga TrueNat Laboratory-ah niminpiah khan Sample 351 enfiah niin hri kai 33 hmuh a ni bawk a, an zinga 21 te hi Lunglei District-a hri kai hmuhchhuah niin Kolasib District-ah hri kai mi 5, Aizawl District-ah 3, Siaha District-ah 2 leh Mamit leh Serchhip District-ah hri kai pakhat ve ve hmuh an ni bawk.

Rapid Antigen Test hmangin niminpiah khan Mizoram-ah Sample 3140 enfiah niin hri kai mi 304 hmuh an ni a, an zinga 172 te chu Aizawl District ami niin Chhinga Veng-ah 18, Bawngkawn-ah 14 leh Ramthar-ah 11 hmuh niin a bak hi Veng 36 ami an ni bawk. Lunglei District-ah hri kai 39 hmuh niin Lunglei khawpui chhung ami vek an ni a, Kolasib District-ah hri kai mi 35 hmuh niina tam zawk hi Kolasib khawpui chhung ami an ni bawk. Mamit District-ah pawh hri kai mi 35 hmuh niin Zawlpui khua ah hri kai 14 hmuh an awm a, Siaha District-ah hri kai 17 hmuh niin an zinga mi 13 te chu Meisavaih West  ami an ni. Heng bakah hian Champhai District-ah hri kai mi 4 hmuh niin Serchhip District-ah hri kai mi pahnih hmuh an ni bawk.

Nimin khan Mizoram-ah hri kai enkawl dam mi 157 an awm belh leh a, heti hian nimin thlengin Mizoram-a hri kai hmuhchhuah chu 24,702 niin heng zinga 19,994 te chu enkawl dam an ni tawh a, hei hi hri kai hmuhchhuah atangin zaa 80.94 niin tunah hian hri kai enkawllai 4595 an la awm mek a. Hri kai mi 400 aia tam awm mekna District 4 lai a awm bawk a ni.

Hri kai zingah boral mi 113 an awm tawh :

Nimin khan Mizoram-a hri kai enkawl zingah mi pakhat boral lehin Mizoram-ah COVID-19 hri kai boral mi 113 an awm ta. Nimin a boral hi K. Lalchamliana (75), Sihphir niin June 28 khan hri a kai tih hmuhchhuah a ni a, hemi ni vek hian ZMC-ah dahluh nghal niin nimin zing dar 8:15 khan a boral zui ta a ni. Heti hian nimin thleng khan Mizoram-a hri kai zingah mi 113 zet an boral ta a, tun thla chhung bikah mi 20 zet an boral leh ta bawk a ni.