Latest News

Meter Reading nei lova Electric Bill siam pe rihlo turin Consumers Association in an ngen

Serchhip District Consumer Association (SDCA) chuan P&E Department in tun thla-a Electric bill reading la lova an siam chu duh lovin hmalak mek a ni tih an sawi a. Mipui te pawh Electric bill pe rihlo turin an ngen bawk.

Serchhip District Consumers Association hian nimin khan Electric Bill chungchangah hian thutkhawm hmanhmawh neiin tunhnaia P&E Department ten COVID-19 avanga Electric Meter reading an neih theihloh avanga mipuite hnenah thla kalta bill atang chawk rual (average la)-a Electric Bill an siam ringawt chu a thalo in a fello hle nia an hriat thu an sawi a. Mipui ten an Electric hman mil ni lo, thla hlui mila Bill an chawi tur chu a dik theilo nia an hriat thu sawiin, hemi chungchangah hian Mizoram Consumer Union te chuan tuna Bill hi cancel-a a tul anga siamtha turin thuneitu lamah an ngen mek tih an sawi bawk. Serchhip District Consumers Association chuan hetiang anih avang hian P&E Department lamin bill an siamthat hma chu Electric Bill pe rih lo turin Serchhip District mipui te an ngen tih sawiin, Bill pek loh avanga disconnection tawk emaw, harsatna tawh emaw an awm anih chuan Consumer hruaitute hnenah hriattir tur a ni tih an sawi a. Electric Bill lo pe hman tawh te pawhin thla leh-a siamrem turin an Bill pek zat leh a receipt te lo chhinchhiah theuh tur a nih thu an sawi bawk.

Tarlan tawh angin COVID-19 hri leng avanga thla hmasa lamah P&E Department lamin mipuite Electric hman zat enna, Meter Reading an kalpui theihloh avangin tun thla-a Electric Bill siamna atan thla thum kalta chhunga Electric bill chawhrual chu hman a nih thu hi Serchhip Power Sub-Division a SDO, Lalhruaitluanga chuan a lo sawi tawh a. P&E SDO chuan thla khat kalta-a Bill chawi anga Bill siam emaw chu lo hman tam deuh tum te a awm theih avangin thil remchang a ni lo tih a sawi a, a fair thei ang berin Reading neih theih hun lai thla thum (3) chhunga Bill chu chawkrualin hemi ang hian Bill hi siam a nih thu leh kumin March, April leh May thla-a Bill te chawhrualna atan hian hman a nih thu pawh LENKAWL a lo hrilh tawh bawk a. Tuna Department in Reading an neih leh pawh Department hotu ten Reading hi nei phawt tura ruahmanna an siam anga nei phawt an nih thu a sawi a. Hetihlai hian mi thenkhat chuan tun thla a Bill an chawi chu thla thum (3) kalta a an chawi chawhrual aia a tam zawk nia an hriat thu an sawi thung a ni.

Comments

Chhiar Hlawhte