MZP in Assam Police te an inhnuhdawh loh chuan inbiakna neih tur thulh rih an duh tih an sawi

Mizo Zirlai Pawl (MZP) chuan Assam leh Mizoram Chief Secretary ten tun thla ni 9-a inbiakna an neih tur chu Mizoram chhung atanga Assam Police te an inhnuhdawh hma loh chuan thulh rih nise an duh thu an sawi.

MZP General Hqrs. hian nimin khan thuchhuah siamin June 29, 2021-a Assam Police ten Mizoram chhung Vairengte bul, Aitlang a hmathar rawn la a, Mizote huan an rawn suasam bakah inbenbelna tura hmalakna an nei chu an ngai thutak hle tih sawiin, Assam Police ten tunhnaia Vairengte bul Aitlang-a hmathar an rawn lakna chu Mizoram chhung dik tak, Bengal Eastern Frontier Regulation (BERF) 1875 ramri chhung a ni tih an sawi a ni.

MZP chuan BEFR-1875 ramri lo hi Mizo te’n Assam State nen ramri dang kan nei lo tih hi Mizo mipui dinna a ni tih sawiin, “Kan pi leh pu te’n lu chhum ban chhum huama an lo sah kuak sa ramri humhalh hi thangtharte kuta innghat a nih avangin he ramri humhim ngamlotu nih hi Hnam phatsanna tluk hial niin kan ngai a. Hei vang hian hun hmasa lamah pawh BERF-1875 ramri humhalh tur hian MZP chuan a theihtawp a lo chhuah tawh thin a; thisen hial chhuaka hmalakna pawh kan lo nei tawh bawk a ni,” an ti a. Mizoram leh Assam ramri chungchangah hian June 28, 2021 khan Delhi-ah Joint Secretary, Union Home Ministry hnenah MZP President, B. Vanlaltana hovin Memorandum thehluh a ni tih an sawi bawk.

Mizo mipuite duhdan a ni tih hriain MNF kaihhruai sawrkar Council of Minister Meeting pawhin July 8, 2019 khan BEFR 1875 ramri hi Mizoram ramri atan pawmin thutlukna a lo siam tawh tih MZP chuan sawiin, hei hi lawmawm an tih rualin he thutlukna bawhzuia ramri humhalh tura sawrkar hmalakna erawh a chak tawk lo an tih thu an sawi a. “Tuna Assam sawrkarin hmathar a rawn lakna leh an inkulhna hmun hi BEFR-1875 ramri chhung a ni tih Mizoram sawrkar kan hriattir nawn a. Chuvangin, kan ram chhunga rawn inkulh Assam Police te hi a rang thei ang bera Mizoram atanga umchhuak turin MZP chuan Mizoram sawrkar kan ngen a ni,” an ti a. “Kan ramchhung atanga Assam Police an inhnuhdawh hma loh chuan Assam sawrkar chu eng Level-ah mah inbiakna neihpui lo turin Mizoram sawrkar kan ngen a. Assam Police te hi kan ram chhung atanga an inhnukdawk duh lo anih chuan nawr chhuak mai turin Sawrkar kan phut tlat bawk a ni,” tiin “July 9, 2021-a New Delhi-a Mizoram Chief Secretary leh Assam Chief Secretary inbiakna neih tur pawh hi Mizoram chhung atanga Assam Police te an inhnuhdawh hma loh chuan thulh rih nise tih hi MZP duhdan a ni,” an ti bawk.