Serchhip District chhunga ASF hri lenna khaw 14-ah Vawk 939 a thi tawh

Serchhip District chhunga khaw 14-a Vawk thi te chu enfiah a nih hnuah Vawk hri leng mek, African Swine Fever (ASF) hri an kai tih hmuhchhuah a ni tawh a, Serchhip District-ah hian ASF vanga Vawk thi chu 939 a tling tawh.

Serchhip District chhung khaw hrang hranga ASF hri leng mek chuan ziaawm lam ala pan thei meuhlo niin a lang a, Vawk thi pawh la awm belh zelin Serchhip District-a khaw 7-a Vawk thi te chuan ASF hri an kai tih hmuhchhuah a ni leh tawh a, a hmaa khaw 7 lo puan tawh te nen tunah hian Serchhip District chhunga khaw 14-ah chuan ASF hi a leng tawh a ni. Tuna Vawk hri lenna hmuna puan thar leh tak te hi Serchhip khawpui chhunga Dinthar Veng, Hmar Veng, Chanmari leh Field Veng bakah Hriangtlang, Chhingchhip Mualpui leh Zote South te an ni a, heng khaw hrang hrang 14-ah te hian nimin khan Vawk thi 15 chhinchhiah belh leh an ni a, heng te nen hian Serchhip District chhunga Vawk hri lenna hmun 14-a Vawk thi chu 939 a ni tawh a, heng khaw hrang hrangah hian Vawk 9 te chu suat leh ni bawkin nimin thleng khan Vawk hri lenna hmuna puan tawh ah hian Vawk 489 suat an ni tawh a. Vawk thi tamna ber New Serchhip-ah Vawk 242 thi tawhin Thenzawl-ah 232 a thi tawh bawk a ni.

Serchhip District chhunga khaw dang 20-ah te pawh chhan hriatloh a Vawk thi ala awm belh zel a, nimin khan khaw 4-ah Vawk thi 9 awm lehin heng te nen hian chhan hriatloh a Vawk thi hi 143 a tling tawh a, nimin-a Vawk thi awmna te hi Chhim Veng leh Bungtlang-ah 3 ve ve leh Buangpui-ah 2 leh Buhkangkawn-ah pakhat te an ni a. Vawk hri lenna hmun-a puan la ni lo ah hian Vawk 53 zet suat a ni tawh bawk a ni.

Hetihlai hian Mizoram pumah ASF hri leng avanga Vawk thi chu 9,172 tling tawhin nimin khan Vawk thi 167 a awm belh leh bawk a, Mizoram District 11 zingah Kolasib tihloh District dang zawngah chuan hri kai hi hmuh ni tawhin khaw 152-ah hri kai hmuh a ni tawh a. Nimin khan chhan hriatloh-a Vawk thi 28 awm leh bawkin heng te pawh hi finfiah ni lo mah se ASF vanga thi nia rin an ni bawk.