MZP in ramri-a buaina thlenna hmun an tlawh

MZP General Headquarters hruaitute chuan Inrinni khan an Vice President, Peter Chhangte hovin Mizoram chhung Vairengte ram-a Assam lamin harsatna an siamna hmun, Aitlang chu an tlawh.

MZP hruaitute chuan Vairengte ram Aitlang hmunhma leh thil thlen dan te a hmunah tlawhin an enfiah a, tun hma kum tam tak kalta atanga kan pi leh pu ten an lo luah thin ram leh tunah pawh Vairengte khaw mi leh sa ten huan thlai an enkawl mek chu Assam Police leh Assam miten hneh-chhuhin an luah luih sak a. Mizo kuthnathawk a eizawng te huan thlai tihchhiatsak an ni leh an ran te thlenga suasam sak an ni te, thlai leh ran neitu ten an eizawnna enkawl zui ngam lova an kalsan chu rilru nat thlak an tih thu an sawi a ni.

Ramri chungchanga buaina a chhuah apiangin kan ram sipaite a che tlai zawk leh a tlem zawkah an tang zel leh a chan chhe zawkah an tang fo mai te chu MZP chuan hriatthiam harsa an tih thu an sawi a. Tuna Assam miten kan ram min chuhpuina hmun leh ramri buai chhuahna hmunah te hian kawng tha a tlang loh avangin ram hauh thu ah leh hmalakna kawngah harsatna nasa tak kan tawk nia an hriat thu an sawi a. Kan ram kan chan zel loh nan sawrkarin ramri hma-sawnna leh ramri hauh chungchangah chak lehzuala hmala turin thuneitute an phut tih an sawi bawk.