Serchhip Sub-Hqrs. YMA in Assam Chief Minister chet dan an dem thu an sawi

Serchhip Sub-Hqrs. YMA chuan tunhnaia Mizoram leh Assam inrina-a buaina thleng chungchanga Assam Chief Minister chet dan chu an dem thu an sawi.

Serchhip Sub-Hqrs. YMA hian nimin, July 30, 2021 tlai khan Serchhip Sub-Hqrs. YMA Conference Hall-ah SEC thutkhawm hmanhmawh neiin tunhnaia Mizoram leh Assam ramri-a buaina thleng chungchang hi an sawiho a, hemi hnua thuchhuah an siamah tun thla ni 26-a Assam leh Mizoram Police te inkahna thleng chungchanga Assam Chief Minister, Himanta Biswa Sharma chet danah an lungawiloh thu sawiin, Mizote dawt hlir-a min puh hmingchhiat tumtu chu an dem takzet tih an sawi a. Assam Chief Minister chu India hmarchhak inunauna tichhetu leh India ram inpumkhatna tihchhiat pawh pawi ti lova dawt ringawt hmanga Mizote bei-ah puhin, dawt hmanga Mizote a puhna ah hian National Media kaltlang ngaia ngaihdam dilna siam tura an phut thu leh India ram inpumkhatna leh inunauna vawnhim zel an duh thu an sawi bawk.

Nimin a Serchhip Sub-Hqrs. YMA Executive Committee thukhawm hian tunhnaia ramri buaina avanga Mizoram venhim hna thawk tura thawkchhuak Mizoram Police te tan hian an chawhmeh leh mamawh tur thawn ve nise tiin hemi atan hian Serchhip Town chhunga YMA Branch 21 huamchhung ami ten thawhkhawm nise an ti a. Heng chawhmeh leh thildang thawh duhte tan hian karleh Thawhtanni, August 2, 2021 zan-a chhuahpui hman turin thawhkhawm nise an ti a, Serchhip leh New Serchhip huamchhung ami te tan Serchhip Sub-Hqrs. YMA Office-ah dahkhawm tur niin Chhiahtlang lam tan Chhiahtlang Bazar-ah dahkhawm tur a ni anga, heng te hi Vairengte-a hlan turin Thawhtanni zan-ah Serchhip Sub-Hqrs. YMA hruaitu ten an kalpui dawn a ni.

Hei bakah hian nimin-a SEC thukhawm hian Branch YMA ten a tula hman tura Serchhip Damdawi In-a Kuang an thawhkhawm chu tun dinhmun ah hman tur a awm mumal tawhloh avangin Branch hrang hrang ten a remchan anga thawhkhawm leh nise an ti bawk.