COVID kaihhnawiha nu leh pa chan naupangte tan chhawmdawlna leh hamthatna ruahman a ni

Supreme Court thuchhuak ang leh sawrkar laipuiin ruahmanna a siam angin, COVID-19 kaihhnawiha nu leh pa chan naupangte tan chhawmdawlna leh hamthatna tur hrang hrang ruahman a ni a. Hetiang kaihhnawiha vanduaina tawk naupangte chhawmdawl leh enkawl zui an nih theih dan tur ngaihtuah hian nimin khan Aizawl-ah thutkhawm neih a ni.

Nimin-a Aizawl District Bawrhsap hova District Child Protection Committee thutkhawm ah hian Supreme Court chuan India ram-a State leh Union Territory hrang hrangte chu India rama COVID-19 hri a len nasat hnu, March 2020 hnulama Covid vanga an nu emaw, pa emaw chan leh chhan dang vanga nu leh pa chan te chhinchhiah a, an chanchin kimchang te National Commission for Protection of Child Rights-a thlen vek tura a tih thu tarlan a ni a. Heng naupangte hi an khawsakna kawngah harsatna engmah an tawh zui loh nan ei leh in tur, zirna, hriselna lama an mamawh leh mamawh dangte chu sawrkarin a tul anga ngaihtuah vek turin a ti a. Hetiang vanduaina tawk naupangte hmatheha hmanga sum hmuhna kawnga hman emaw, sawrkarin Dan a siam ang zawm lova lo lak (adopt) emaw pawh phal a ni lo tih an sawi bawk.

Covid vanga nu emaw, pa emaw chan, kum 18 hnuailamte chhawmdawlna tur sawrkar laipuiin a ruahman, ‘PM Cares for Children - Empowerment of Covid Affected Children’ chu Prime Minister Narendra Modi chuan nimin khan a tlangzarh thu he hunah hian tarlan niin, he ruahmanna hnuaiah hian vanduaina tawk naupangte hi chhinchhiah vek tura tih an ni a, kum 18 an tlin veleh PM Cares Fund atang hian thla tin stipend an dawn theih dawn bakah kum 23 an tlinin cheng nuai 10 an dawng thei dawn a. A thlawna zirna pek tur niin Higher Education atan Students Loan an la thei anga, PM Cares Fund atang hian Loan interest hi rulh sak an ni dawn a ni. Heng bakah hian Ayushman Bharat hnuaiah kum 18 an tlin thlengin Health Insurance cheng nuai 5 tihsak an ni dawn a, PM Cares atang tho hian Premium peksak an ni dawn a ni.

He thutkhawm ah hian Mizoram Home Association aiawhte chuan nikum July hnu lamah sawrkar laipui atanga Fund an dawn tur ang te an dawng mumal ta lo hle tih an sawi a, Central atanga sum rawn kal tawh si, an hnena thleng mai lo te pawh awma an hriat thin thu sawiin, sum lam leh buhfai bikah harsatna, a bikin COVID-19 len hnu ah an tawk nasa tih an sawi bawk.

COVID-19 thawh khatna ah khan Childrens Home bikah naupang 8 in hri kaiin a thawh hnihna ah Home naupang 40-in hri an kai ve tawh bawk a. Aizawl District bikah Covid kaihhnawiha nu/pa chan naupang 46 an awm tawh bawk a ni.