NTSE-ah Mizoram atangin zirlai 3 inziaktling

National Council of Educational Research and Training (NCERT)-in tunhnaia National Talent Search Examination-2020 result a tihchhuah ah Mizoram atangin zirlai pathum an tling.

NTSE-2020 a Mizoram atanga inziak tling te hi Lalkhawngaihi, Samuel C. Vanlalpeka leh Simon Lalremsiama te niin St. Pauls HSS zirlai vek an ni. NTSE hi kumtin Class X zirlaite tan buatsaih thin a ni a, State leh National Level awmin, State Level chu India ram hmundang zawngah kumtin November Pathianni hmasa berah neih thin a ni a, Nagaland, Andaman and Nicobar Island, Meghalaya leh Mizoram-ah te chuan Sunday hi ni pawimawh a nih avangin November thla Inrinni hmasa berah neih thin a ni thung a. National Level chu kumtin May thla Pathianni vawi hnihnaah neih niin, State Level-a tlingten an exam leh thin a ni.

NTSE-a tlingte hian thlatin Scholarship an hmu thin a, Scholarship hi tuna Scheme hman laiah chuan Science leh Social Science-a Doctoral Degree thlenga zir tumte leh Professional Course heng- Medicine leh Engineering zir zui tumte pek thin an ni. Scholarship hi ram pumah mi 2000 hnenah pek thin a ni a, SC tan 15%, ST tan 7.5%, OBC tan 27% leh vohbik zirlaite tan 4% hauhsak thin an ni. Scholarship hi Higher Secondary tan thlatin Rs. 1250/-, Graduate leh Post Graduate tan thlatin Rs. 2000/- Ph.D tan kum 4 chhung UGC norms angin pek thin a ni.