Thla 3 Bill chawhrual hmangin Electric Bill siam

COVID-19 hri leng avanga thla hmasa lam ah P&E Department lamin mipuite Electric hman zat enna, Meter Reading an kalpui theihloh avangin tun thla-a Electric Bill siamna atan thla thum kalta chhunga Electric bill chawhrual chu hman a ni.

Tunlai hian Serchhip-ah P&E Department chuan Electric Bill semchhuah hna an thawk leh mek a, thla hmasa lamah COVID-19 hri leng avanga Electric Consumers te In-ah kala an kawlphetha hman zat enna, Power Reading  kalpui theih a nih loh avanga hemi chungchanga LENKAWL zawhna chhangin Serchhip Power Sub-Division a SDO, Lalhruaitluanga chuan Consumers ten thla thum (3) kalta chhunga kawlphetha an hman zat chawh-rual chu tun tumah hian Electric Bill siamna atan hian an hman thu a sawi a ni.

P&E SDO chuan thla khat kalta-a Bill chawi thin anga Bill siam emaw chu lo hman tam deuh tum te a awm theih avangin thil remchang a ni lo tih a sawi a, a fair thei ang berin Reading neih theih hun lai thla thum (3) chhunga Bill chu chawkrualin hemi ang hian Bill hi siam a nih thu leh kumin March, April leh May thla-a Bill te chawhrualna atan hian hman a nih thu a sawi bawk. Lockdown avanga sumdawnna hmun tam tak, Workshop thenkhat ten hun engemaw chhung Electric an hman theihloh tawh chungchanga zawhna chhangin, tunah hian Bill semchhuah chauh a nih avanga complain an la dawn loh thu leh hetiang hi a awm a nih chuan an Department hotu sang zawk atanga Instruction awm anga kalpui a nih tur thu a sawi bawk.

Tunah hian Meter Reader ten Bill hi semchhuak mekin hemi rual hian Reading hi neih leh a ni tawh a, thla hmasa lama Meter Reading neih a nih loh avangin tun ami ngawt chu Bill siamna atana hman theih a nih dawnloh chungchanga zawhna chhangin SDO chuan, an Department hotu ten Reading hi nei phawt tura ruahmanna an siam anga nei phawt an ni tih a sawi bawk.