Latest News

Hri kai hmuhchhuah tam ber ni thleng leh ta

Mizoram-ah COVID-19 hri kai hmuhchhuah an la pung zel a, niminpiah khan Sample 5308 enfiah niin hri kai 847 hmuhchhuah leh a ni a, Sample enfiah atanga za zela 15.95 in hri kaiin Mizoram-a ni khat a hri kai hmuhchhuah tam ber ni a thleng leh a, Mizoram-a hri kai hmuhchhuah pawh mi sing thum aiin an tam ta a ni.

Niminpiah khan ZMC-a RT-PCR Laboratory-ah Aizawl, Saitual leh Mamit District atanga Sample lak 1169 enfiah niin heng atang hian COVID-19 hri kai mi 126 hmuh an ni a, an vai hian Aizawl District-a Sample lak vek niin hri kai hmuhchhuah tamna ber Muanna Veng-ah hri kai mi 26 hmuh an ni a, Chanmari West-ah hri kai mi 18 hmuh ni bawkin a bak hi Veng leh khua 28 ami an ni bawk.

District hrang hranga TrueNat Laboratory-ah pawh Sample 497 enfiah ni bawkin hri kai mi 60 hmuh an ni bawk a, an zinga mi 17 te chu Lunglei District-a hri kai hmuhchhuah niin Champhai District-ah hri kai mi 15 hmuh niin an zinga 14 te chu Zokhawthar khua ami te an ni a. Siaha leh Mamit District-ah hri kai mi 8 ve ve hmuh niin Kolasib District-ah mi 7 leh Aizawl District-ah hri kai mi 3 hmuh an nih bakah Lawngtlai District-ah hri kai mi pahnih hmuh an ni bawk.

Rapid Antigen Test hmangin niminpiah khan Sample 3642 enfiah ni leh bawkin heng atang hian hri kai 661 hmuh leh an ni bawk a, heng zinga 382 te hi Aizawl District-a hri kai hmuhchhuah niin Baktawng Tlangnuam-ah hri kai 54 zet hmuhchhuah an awm a, midang te hi Veng leh khua 61-a hri kai hmuchhhuah an ni bawk. Heng bakah hian Kolasib District-ah hri kai mi 123 hmuhchhuah an awm bawk a, Lunglei District-ah hri kai mi 99 hmuhchhuah awmin Lawngtlai District-ah 27, Mamit District-ah 20, Siaha District-ah 4, Serchhip District-ah 3, Saitual District-ah 2 leh Champhai District-ah hri kai pakhat hmuhchhuah an ni.

Nimin khan Mizoram-a COVID-19 hri kai zingah mi 185 te chu enkawl dam an ni ve leh bawk a, heti hian nimin tlai dar 5:00 thlenga Mizoram-a COVID-19 hri kai hmuhchhuah chu 30,492 an tling tawh a, an zinga mi 22,802 te chu enkawl dam ni tawhin hei hi hri kai hmuh atanga chhutin zaa 74.78 a ni a, hri kai enkawllai 7559 an la awm a ni.

Hri kai zingah mi 133 an boral tawh :

Mizoram-a COVID-19 hri kai zingah mi 133 zet an boral tawh. Nizan hmasa dar 11:15 khan Saizinga (75), Armed Veng South chu COVID-19 vangin ZMC-ah a boral a. Nimin tlai dar 5:45 khan Ebenezer (37), Vaitin khua chu ZMC-ah COVID-19 vanga boral lehin nizan dar 6:50 khan SK Das (74), Tuirial chu ZMC-ah a boral ve leh bawk a ni. Heti hian nizan thleng khan Mizoram-a COVID-19 hri kai zingah mi 133 boral tawhin hei hi hri kai hmuhchhuah tawh atanga chhutin za zela 0.43 a ni.

Comments

Chhiar Hlawhte