Latest News

Ni 3 chhungin hri kai 1500 aia tam hmuh an ni

Niminpiah-a Mizoram-a Sample enfiah 5253 atangin COVID-19 hri kai 581 hmuhchhuah leh an ni a, tunhnai ni thum chhungin Mizoram-a hri kai hmuhchhuah chu 1500 aiin an tam zawk a ni.

Niminpiah khan ZMC RT-PCR Laboratory-ah Sample 1465 enfiah niin heng atang hian hri kai 59 hmuhchhuah an ni a, an vai hian Aizawl District-a Sample lak zek niin hri kai hmuhchhuah tamna be Armed Veng-ah hri kai mi 16 hmuh an ni a, hri kai hmuhchhuah te hi hri kai tawh te nen inkawmhnaihna neih avanga inkhunghrang lai te an ni.

Niminpiah khan District hrang hranga TrueNat Laboratory-ah Sample 401 enfiah niin hri kai mi 25 hmuhchhuah an ni a, an zinga mi 13 te chu Lunglei District ami niin Champhai District-ah 5, Kolasib District-ah 3 leh Mamit, Serchhip leh Lawngtlai District-ah pakhat theuh hmuh an ni bawk.

Rapid Antigen Test hmangin niminpiah khan Sample 3387 enfiah ni leh bawkin hri kai 497 zet hmuhchhuah an awm a, an zinga 213 te chu Aizawl District ami te niin hri kai hmuhchhuah tam zualna te chu Zemabawk North-ah 20, Chhinga Veng-ah 18, Dinthar Veng-ah 16, Bethlehem Vengthlang-ah 12 leh Bethlehem Veng, Dawrpui Vengthar leh Ramhlun North-ah 10 theuh te an ni a, Central Jail-a tang zingah hri kai mi 7 hmuh leh an ni bawk. Kolasib District-ah hri kai 126 hmuh niin heng zinga 108 te chu Thutak Nunpuitu Team, Khuangpuilam ami an ni a, Mamit District-ah hri kai 56 hmuh ni bawkin Dapchhuah-ah 28, Bung-thuam-ah 12 leh Zawlpui-ah 10 hmuhchhuah an ni.

Lawngtlai District-ah pawh hri kai 48 hmuh niin an zinga 16 te chu Longpuighat khua ami te an ni a, Lunglei District-ah hri kai 45 hmuh niin an zinga 41 te chu Lunglei khawpui chhung ami an ni a, Siaha District-ah hri kai 8 hmuh niin Serchhip District-ah hri kai pakhat hmuh a ni bawk.

Heti hian ni thum kalta chhungin Mizoram-ah hri kai 1568 zet hmuhchhuah awmin nimin thlenga hri kai hmuhchhuah chu 25,751 an tling tawh a. Nimin khan hri kai mi 146 te enkawl dam awmin nimin tlai dar 5:00 thlenga Mizoram-a hri kai enkawl dam chu 20,408 an ni ta a, hei hi hri kai hmuhchhuah atangin zaa 79.25 niin tunah hian hri kai enkawllai 5227 an la awm mek a ni.

Hri kai zingah mi 116 an boral tawh :

Mizoram-a COVID-19 hri kai zingah boral awm belh zelin nimin zing dar 3:45 khan Zothani (74), Saron Veng Aizawl chu ZMC-ah a boral ve leh a, nizan dar 7:40 khan A. Malsawmi (72), Diltlang South (Lawngtlai District) chu ZMC-ah a boral ve leh bawk a ni. Heti hian nimin thleng khan Mizoram-a hri kai zingah mi 117 boral tawhin tun thla ah mi 24 an boral tawh a ni.

Comments

Chhiar Hlawhte