Hri kai thar 774 hmuh belh leh an ni

Mizoram-ah ni khat-a COVID-19 hri kai hmuhchhuah zat ala tlahniam thei tak tak lova, niminpiah khan Sample 6795 enfiah niin hri kai 774 hmuh leh an ni a, Sample enfiah atanga za zela 11.39 te chuan hri an kai a ni.

Niminpiah khan ZMC-a RT-PCR Laboratory-ah Sample 1908 enfiah niin heng atang hian hri kai 163 hmuhchhuah niin Sample enfiah atanga za zela 8.54 in hri an kai a, hri kai hmuhchhuah te hi Aizawl District atanga Sample lak vek an ni. RT-PCR Laboratory atanga hri kai hmuhchhuah ah hian Veng mal-ah Armed Veng South chu hri kai hmuh tamna ber niin mi 24 zet hmuh leh an ni a, Bawngkawn-ah hri kai mi 17 hmuh niin Dinthar Veng leh Electric Veng-ah hri kai 11 ve ve hmuh niin Sairang Dawr Veng leh Venghlui-ah hri kai mi 10 ve ve hmuh an ni bawk a, a bak zawng hi Veng leh khua 20 ami an ni.

District hrang hranga TrueNat Laboratory 9-ah niminpiah khan Sample 247 enfiah niin heng atang hian hri kai 35 hmuhchhuah niin Sample enfiah atanga za zela 14.17 te chuan hri an kai a, Champhai leh Mamit District-ah hri kai mi 11 ve ve hmuh niin Siaha District-ah 6, Lunglei District-ah 4, Lawngtlai District-ah 2 leh Aizawl District-ah hri kai mi pakhat hmuh an ni bawk.

Mizoram District hrang hrangah Rapid Antigen Test hmangin niminpiah khan Sample 4640 enfiah ni bawkin heng atang hian hri kai 576 hmuh niin Sample enfiah atanga za zela 12.41 te chuan hri an kai a. Aizawl District-ah hri kai mi 359 hmuh niin Veng mal-a hri kai hmuh tamna ber Lawipu-ah 37 hmuh an ni a, Zuangtui-ah 35 leh Edenthar-ah 30 hmuh niin hri kai mi 10 leh a aia tam hmuhna Veng dang 7 a awm bawk a. Midang zawng hi Veng leh khua 48 atanga hmuh an ni bawk. Kolasib District-ah hri kai mi 97 hmuh niin Lawngtlai District-ah 48, Lunglei District-ah 45, Siaha District-ah 11, Champhai District-ah 7, Mamit, Serchhip leh Saitual District-ah hri kai mi 3 theuh hmuh an ni bawk.

Heti hian Mizoram-a COVID-19 hri kai hmuhchhuah chu 37,171 an tling ta a, nimin khan hri kai mi 342 te chu enkawl dam niin heti hian nimin tlai dar 5:00 thleng khan mi 25,510 (68.63%) te chu enkawl dam an ni tawh a, hri kai enkawllai 11,518 an la awm mek a ni.

Hri kai zingah mi 3 boral leh

Mizoram-a COVID-19 hri kai zingah mi 143 zet boral an awm tawh. Nizan hmasa dar 11:10 khan Hrangdawli (56), Keitum chu ZMC-ah boralin hemi hma ni-a Aizawl District-a COVID-19 hri kai hmuhchhuah a nih avangin Serchhip District case ni lovin Aizawl District case a ni a. Nimin zing dar 7:45 khan Mangi (41), Chawlhhmun chu COVID-19 vangin ZMC-ah a boral leh bawk a. Hei bakah hian PS. Lalrinngheta (40), Armed Veng South chu nimin tlai dar 4:00 khan a boral leh bawk.