Latest News

Pathianni-ah hri kai mi 91 hmuh belh leh an ni

Pathianni khan Mizoram-ah Sample 789 enfiah leh niin hri kai mi 91 hmuhchhuah an ni a, hri kai hmuhchhuah zat hi tlem mah se Sample enfiah atanga chhut chuan za zela 11.53 in hri an kai a ni.

ZMC Laboratory-ah Pathianni khan Sample enfiah awm lovin District hrang hranga TrueNat Laboratory-ah Sample 37 enfiah niin heng atang hian hri kai mi 4 hmuh an ni a, Lunglei District leh Serchhip District atangin 2 ve ve niin hri kai hmuhchhuah tawh nen inkawmhnaihna neih avanga inkhunghrang lai an ni.

Rapid Antigen Test hmangin Pathianni khan Mizoram hmun hrang hrangah Sample 752 enfiah niin hri kai mi 87 hmuh an ni bawk a, heng zinga 64 te chu Aizawl District ami an ni  a, Kolasib District-ah hri kai mi 9, Lunglei District-ah 8 leh Siaha District-ah 4 bakah Mamit leh Saitual District-ah hri kai pakhat ve ve hmuh an ni.

Nimin khan Mizoram-a COVID-19 hri kai mi 365 te chu enkawl dam ni ve lehin heti hian Mizoram-a hri kai hmuh tawh chu 21,334 niin an zinga 18026 te chu enkawl dam an ni tawh a, hri kai enkawllai 3210 an la awm a ni.

Hri kai zingah mi 98 an boral tawh

Mizoram-a COVID-19 hri kai zingah mi pathum boral lehin, hri kai boral chu mi za an tling dawn hnai ta. Nimin zing dar 1:30 khan Shanda Prova Chakma (57), Chawngte C chu COVID-19 vangin a boral a, June 29 khan hri a kai tih hmuhchhuah niin nizan hmasa khan ZMC panpui a nih laiin Lungrang South khaw dai-ah a boral a ni. Nimin zing dar 8:25 khan T. Lalzamlova (66), Electric Veng Aizawl chu  ZMC-ah boralin nimin chawhnu dar 1:00 khan Ngurliantluangi (72), Armed Veng South chu ZMC-ah a boral ve leh bawk a ni. Heti hian Mizoram-a COVID-19 hri kai zingah mi 98 te chu an boral tawh a ni.

Comments

Popular News (Last 30 Days)