Latest News

Agriculture leh a kaihhnawih Department hotute kawm

Nimin khan Champhai South bialtu MLA leh Law & Judicial Minister, TJ. Lalnuntluanga chuan Champhai District-a Agriculture leh a kaihhnawih Department hrang hrang hotute kawmin an hmalakna leh hmachhawp te a sawipui.

Champhai DC Conference Hall-a he hun hman ah hian TJ. Lalnuntluanga chuan COVID-19 hri leng inkhuahkhirhna kalpui mek vangin hmasawnna ruhrel khawih leh hmachhawp neih mekte hlen a har rih thu sawiin, Agriculture leh a kaihhnawih Department dangte chu mipui nawlpui mar dek, an eibel leh inghahna ber berte an nih hlawm thu leh ngaihpawimawh an nih thu a sawi a. Mipui ten hamthatna an hmuh theih turte leh an tangkaipui turte hrilhhriat leh hmalak sak kawngah tun aia nasa zawka penchhuah a ngai tih a sawi bawk.

He hunah hian Champhai District Bawrhsap Maria CT. Zuali pawhin intodelhna tham buh leh bal thar chhuah theihna Champhai District-in a neih thu sawiin, tam leh hlawk tham thar turin tun aia taima lehzuala thawh a ngai a ni, a ti a. Mipui tana thawk tura tih sawrkar hnathawkte nasa lehzuala tan la turin a chah bawk.

He Meeting-ah hian Champhai Leilet tichangtlunga, hlawk zawka buh thar a nih theih dan turte leh hmalak tawhna te sawiho niin, thil thar hlak leh awmze nei zawk hmalakna kalpui a tul takzet thu tarlan a ni a. Leilet lei thur leh al zawng Soil testing mithiamte kaltlanga zirchiana, a tul anga lei tihthat leh siamrem dante ngaihtuah nise tih a ni a. Theihna nasa tak nei Champhai District chhunga Agriculture leh a kaihhnawih Department anga hmalak theihna hrang hrangte sawiho niin, State mai bakah sawrkar laipui Scheme thlenga chhawr tangkai thei turin District Road Map mumal leh project-te siama bawhzui nise tih a ni a. Loneitu leh ranvulhtu ten awlsam zawka mithiamte phone hmanga an rawn zung zung theihna turin Helpline siam nise tih a ni bawk.

He hunah hian Agriculture Department bakah AH & Vety atangin Integrated Piggery Farming, Boar Semen Station, Sial vulh leh African Swine Fever chungchang hmalakna ngaihthlak a ni a. Horticulture department hnuai Scheme hrang hrang hnuaia thei leh thlai chin kawnga hmalakna te, Covid-19 Special Assistance Maintenance Fund hmanga Irrigation & Water Resources department hmalakna te leh FOCUS project kaltlanga hmalakna te department hotute hnen atanga ngaihthlak a ni a. Hmachhawpte zau taka sawiho niin, bawhzui dan turte ngaihtuahho a ni bawk.

Law & Judicial Minister hian nimin chawhnu khan MJA Champhai District member-te chu DC Conference Hall-ah kawmin khawtlang tana mamawh leh tul hrang hrangte a sawipui bawk.

Comments

Chhiar Hlawhte