Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Covid enkawlna atana damdawi mamawh ngah tawk

Zoram Medical College-ah COVID-19 damlo enkawlna atana damdawi an hman te chu tun dinhmunah an ngah tawk a, ventilator pawh nei tha tawkin, Ventilator thar 10 rawn bun turin phai lam atangin Company Rngineer te an rawn kal dawn.

Inrinni khan Health Minister Dr. R. Lalthangliana hovin SAD Conference Hall-ah Mizoram-a COVID-19 kaihhnawih thil pawimawh sawiho a ni a. Meeting-ah hian COVID-19 vanga nu leh pa emaw, nu/pa chan naupang mi 63 an awm tawh thu tarlan a ni a, an zinga 59 hi nu leh pa kara cheng, nu emaw, pa emaw thi niin, midang zawng hi nu emaw, pa emaw nen chauha awm (single parent-in a enkawl) an ni. 

ZMC Doctor te chuan tunhnaiah ZMC-a admit thar leh ICU a enkawl zingah kum naupang lam (thalai ho) an pung tih an sawi a, nitin OT-ah COVID-19 positive zai ngai an neih thin tak thu sawiin, raipuar COVID-19 positive admit ngai an tam thu an sawi bawk.

COVID-19 hri kaite enkawl dan tur Ministry of Health & Family Welfare in a duan thar chu thlirho a ni a, hri kai zingah symptom nei lo leh symptom nei nasa lo (moderate/mild symptomatic) te tan damdawi mahni duh ang ang lo inchawh ve ngawt a him loh thu tarlan a ni. Nachhawkna pangngai (paracetamol) bak ei a tul lo an ti a, COVID-19 damdawi dik tak hmuhchhuah a la nih loh avangin Doctor te hriatpui loha damdawi lo lei mai mai a tha lo tih an sawi a. Tun dinhmunah a hma aiin damlo na zual enkawl ngai an tlem tawh tih tarlangin, damlote enkawlna tur bungrua leh hmanraw chi hrang hrangah thlaphanna tur a awm rih loh thu an sawi a, RT-PCR kit 7500 vel an la neih thu leh tunah hian an chah belh leh mek thu an tarlang bawk.

ZMC-a COVID-19 hri kaite enkawlna tur Ward thar khum 30 awmna chu an hman tan tawh thu sawiin, tun dinhmunah khum 277 a awm mek thu an tarlang a, Ward dang pakhat khum 30 awmna pawh kar hnih chhungin an peihfel leh hman an inrin thu an tarlang bawk.

Health Minister Dr. R. Lalthangliana chuan, “Mizoram-ah COVID-19 hri kai kan la pun belh zel rual hian kan ngaih pawimawh ber tur pakhat chu hri kaite nunna chhanhim a ni a, Doctor te leh Healthcare Frontline Workers ten theihtawp chhuaha tha leh zung tak meuh senga an thawh avangin Pathian in an thawhrimna mal a sawm a, State dangte nen khaikhin chuan kan dinhmun a la ziaawm hle a ni,” a ti.

June ni 28, 2021 thleng khan Mizoram-ah vaccine dose 5,55,286 pekchhuah tawh a nih thu tarlan a ni a. First dose la mi 5,00,990 awmin Full dose la mi 54296 an awm tawh a. Electoral Roll thar ber atanga vaccine la thei zinga zaa 65 in vaccine an la tawh a ni.

Comments

Chhiar Hlawhte