African Swine Fever avanga Vawk chan te chhawmdawlna tur Sawrkarin a ngaihtuah mek

AH&Vety Department Minister Dr. K. Beichhua chuan Mizoram chhunga Vawk pul hri leng mek, African Swine Fever avanga Vawk chan te chhawmdawlna tur Sawrkarin a ngaihtuah mek tih a sawi.

He thu hi nimin khan thuthar thehdarhtute hrilhin AH & Vety Minister chuan tun dinhmunah ASF avanga Mizoram-a Vawk thi zat hi 8360 a ni tawh a, ASF hian District 10 tuam tawhin, Kolasib District chauh a him rih tih sawiin, khaw 143-ah ASF hmuhchuah a ni tawh a, khaw 81 ah thi an awm tawh a, ASF lenna a Vawk suat tawh zawng zawng zat hi 797 a tling tih a sawi bawk. Vety Minister chuan Vawk suat chu Central Guidelines awmsa angin zangnadawmna pek theih a ni tih pawh sawiin, Vawk note kg. 15 buk rit ah Rs. 2200/- niin, kg. 15 - 40 inkar ah Rs. 5800 a nih thu a sawi a, Vawk kg. 40 – 70 inkarah zangnadawmna Rs. 8400/- niin, Vawk no nei tur awm ang chi hi ah Rs. 12,000/- leh Vawk kg. 100 vel bawr chu Rs. 15,000/- anih thu a sawi bawk.

Vety Minister chuan Vawk suat ho chauh nilo, ASF vanga mimal Vawk chan te zawng zawng tan Sawrkarin hma a la zel tih pawh sawiin, State Disaster Management lamah an thlen tawh tih a sawi a, ASF vanga Vawk thi chu chhiatrupna thleng anih loh avangin Disaster-ah puan theih ani lo na in National Disaster Management lamah chhiatna thleng anga puang a, a vulhtuten pawisa tam tak an chan avang leh an rilru thlenga a hnual avangin zangnadawmna an hmuh ngei theihna turin sawrkarin hma a la zel dawn tih a sawi a ni.

Minister chuan ASF in Vawk tam tak a suat avangin Mizoram chhunga Vawk lama intodelh tura an lo inbeisei chu a hlawhchham tih sawiin, Sawrkarin in bultan tharin inthlahpung turin theihtawp an chhuah dawn tih a sawi a, tuna hri leng mek ASF chu a nasat lai ber anih thu leh thi an awm belh reng thu a sawi a. ASF vanga Vawk thi nei te chuan a hri awm tawhlo mahse thla 6 hnuah a In te an tihfai that a, engkim an tihfel that phawt loh chuan vulh leh ngam a nih loh thu leh hri a cham rei theih avangin hun a duh thu a sawi a. Phillipines-ah ASF Vaccine Field Try an nei mek tih pawh sawiin, ASF Vaccine beisei mek anih thu a sawi bawk.

Minister chuan ramchhunga Vawk hri leng dang lo awm tawh te aiin tuna ASF leng chuan Vawk a suat tam ber tih pawh a sawi a, Lockdown avangin Vawk thi hi an tlem phah nia a rin thu sawiin, Vawk hri leng chu mihring in an kai darh theih avangin mihring chhuak an tam chuan a pun belh thin niin a sawi a. Mipuite chu an fimkhur tawh thu leh hri len hnuah dan lova Vawk lakluh emaw, talh emaw a awm tawhlo tih sawiin, Containment Area-a Vawk talh an khap chu an zawm tha hle niin a sawi bawk.