Latest News

Myanmar atanga Mizoram-a raltlan te a theih anga chhawmdawlna pe turin Rajya Sabha MP in a ngen

Mizoram Rajya Sabha Member K.Vanlalvena chuan Myanmar atanga raltlan te ngaihsaka a theih ang anga chhawmdawlna pe turin sawrkar laipui a ngen a. Mizoram-ah raltlante tan Camp pakhat siam a nih thu leh Camp-ah hian an len thawhloh thu a sawi bawk.

Parliament Session neih tur thlirlawk-a thutkhawm chu nimin khan Parliament Annex Meeting Hall-ah neih a ni a. He hunah hian Political Party aiawh zawng zawngte thu sawina hun pek niin he hun hi remchangah hmangin Mizoram Rajya Sabha MP, K. Vanlalvena chuan, Mizoram chhungah Myanmar atanga raltlan tam tak an awm thu leh khaw hrang hrangah an awm darh thu a thlen a. Myanmar buaina avanga sa himna zawnga raltlante chu a theih ang anga Mizoram sawrkar leh tlawmngai pawl te'n chhawmdawlna leh tanpuina an pek thu a sawi a ni.

Rajya Sabha MP K. Vanlalvena hian, Myanmar atanga Mizorama raltlante tana Camp pakhat siam a nih thu leh he Camp-ah hian an len tawh loh thu te sawi chhuakin, Myanmar-ah COVID-19 hri kai an pun thar thu leh nitin-a he hri leng thihpui an awm bakah, Oxygen mamawhna a nasat avangin Mizoram ami an lei thin thu a sawi a, Mizoram nena inkalpawh reng anih avangin sawrkar laipui ngaihsak a tul thu a sawi bawk.

Mizoram Rajya Sabha MP chuan, “Myan-mar Refugee harsatna hi Mizoram thil mai ni lovin, ram pum huapa ngaihmawh thil a nih thu te, Myanmar-ah COVID-19 hri kai an pun zel karah unau inchhungkhat kan tam vanga inkalpawh reng kan nih thu te leh, Refugee treatment mumal hi sawrkar laipuiin pe turin leh raltlante hi ngaihsak turin ka ngen a ni,” tiin thuthar theh-darhtute a hrilh a ni.

Lok Sabha leh Rajya Sabha MP te bakah Political Party Leader-te thukhawm hi Parliamentary Affairs Minister-in a kaihruai a. Prime Minister, Defence Minister leh Commerce Minister-te'n an telpui bawk.

Comments

Chhiar Hlawhte