Covid Third Wave atana Mizoram sawrkar inbuatsaihna tluang takin a kal mek - Health Minister

Nimin khan Health Minister, Dr. R. Lalthangliana hovin Mizoram-a COVID-19 hri hri leng mek chungchanga thil pawimawh chi hrang hrang sawihona neih a ni a. He hunah hian Health Minister chuan COVID-19 Third Wave atana Mizoram sawrkar inbuatsaihna te pawh tluang takin a kal mek tih a sawi.

He sawihona SAD Conference Hall-a neih ah hian Health Minister chuan Mizoram-ah COVID-19 hri kai kan la tlakhniam hleih theih loh rualin kan ngaih pawimawh ber tur pakhat chu hri kaite nunna chhanhim a ni tih sawiin, chutih mek laiin mithiam ten hripui thawh thumna (Third Wave) lo thleng leh ngei tura an sawi avangin kan tlin ang tawk chinah a tha thei ang bera kan inbuatsaih a ngai a ni, a ti a. Third Wave atana Mizoram sawrkar inbuatsaihna te pawh tluang takin a kal mek tih a sawi bawk.

He hunah hian Sawrkar laipui-a Ministry of Health & Family Welfare in Third Wave lo thleng tur chungchanga naupangte enkawlna tur inkaihhruaina tunhnaia a siam, ‘Guidelines on Operationalisation of COVID Care Services for Children & Adolescents’ chu thlirho a ni a. He inkaihhruaina tharah hian damdawi In hrang hranga naupangte enkawlna tur Khum siam belh dan turte, naupang damlo enkawlna tura hmanrua leh damdawi in ruahman dan turte, naupang damlo awmpuitute chungchangte leh khawtlanga inkaihhruaina leh inzirtirna kalpui dante bakah thil pawimawh chi hrang hrang tarlan a ni.

COVID-19 First Wave (April 2020 - February 2021) chhung khan India ramah naupang kum 10 hnuailam COVID-19 hri kai mi 3,68,117 an awm a, Second Wave (March, 2021 - June 21, 2021) chhungin naupang kum 10 hnuailam COVID-19 hri kai 5,68,767 an awm a ni. Hetihlai hian kum 10 - 20 inkar ah First Wave chhunga hri kai mi 9,05,807 awmin, Second Wave chhungin June 21 thleng khan hri kai mi 15,67,972 an awm thung a ni. Mizoram-ah chuan First Wave chhungin naupang hri kai mi 513 an awm a, Second Wave chhung hian 2865 an awm tawh bawk a. Naupangte tan vaccine a la pekchhuah theih loh avangin anni hi Third Wave lakah ven fimkhur lehzual an ngai dawn tih he hunah hian sawi a ni a. Mizoram-ah chuan naupang (Paediatric Age) mi nuai 4 vel awm anga chhut a ni bawk.

Sawrkar laipui-a mithiamte chuan First Wave leh Second Wave-ah naupang hri kai zinga 2 - 3% chu damdawi In-a enkawl ngai an ni tih an tarlang a, an hisap dan chuan Third Wave-ah naupang hri kai zinga 5% vel damdawi In-a enkawl an ngai dawn a, 95% hi chu symptom neilo leh symptom nei nasa lo, Home Isolation emaw, CCC emaw a enkawl ngai an nih rin a ni a. 3% hi Moderate Case, damdawi In-a Oxygen nena enkawl ngai tur nia chhut niin, 2% hi damlo serious, ICU/HDU-a enkawl ngai ni tura chhut a ni bawk. Naupangte COVID-19 hri kaite, hri an kai hnu kar 2 - 6 inkara MIS-C an vei theih avangin he natna veite enkawlna tur hmun lo ruahman lawk a tul thu Guidelines-ah hian tarlan a ni bawk.

Third Wave lo thleng tur chungchangah mipuite hnena inzirtirna tha taka pek a tul thu he hunah hian tarlan niin, hemi atan hian ASHA leh Health Worker te training pek tawh an nih thu tarlan a ni bawk a, Paediatrician te chu CCC-ah Tele-Consultation hmanga rawn theih tura ruahmanna siam tur niin, DCHC-ah chuan on-call duty an nih a ngai dawn bawk a ni.

ZMC-ah naupang enkawlna tur ICU khum 25 leh COVID ward khum 60 awmna ruahman mek a nih thu tarlan niin Aizawl Civil Hospital-ah pawh Paediatric Intensive Care Unit peihfel tawh a nih thu tarlan a ni a, District Hospital-ah te pawh a theih ang anga naupang enkawlna tur Ward ruahmanna siam mek a ni.