Latest News

Ramri-a buaina thlenna hmun Rajya Sabha MP in a tlawh

Mizoram Rajya Sabha MP, K. Vanlalvena chuan Assam Police leh Assam mipuiten Mizoram chuha an rawn nek buaina hmun leh buaina an siam fona- Vairengte, Phainuam, Saihapui V leh Buarchep chu nimin khan a tlawh.

Nimin-a heng hmun a tlawhna ah hian Rajya Sabha MP chuan niminpiah khan Chief Minister hova thutkhawm an neih thu sawiin, “Aitlang a ni emaw, Buar-chep a ni emaw, henglai vela inkalpawhna kawng siamthat ngai awmte chu ngaih pawimawh hmasak tur an nih thu rel a ni a. Tuna mamawh hmasa Police Camp-te pawh Silpauline chauh ni lo, rangva leh hmanraw tha zawka cheibawl thuai tum a ni. Thlam in halsak, huan thlai intihchhiat sak hi keini Mizote chuan kan ti ve ngai lo a. Assam-ho awm mai mai hi an engmah kan tihchhiat sak ve lo, Pathian leh mihring mit hmuhah te, khawvel mit hmuhah pawh thiam kan chang a ni,” tiin helai hmuna buaina ah hian sawrkar chu a tawlh ngai lovang tih a sawi a. “Assam-ho hian min rawn tihbuai ngam leh tawh lohna turin kan inbuatsaih a, hei hi mi va cho leh vauna erawh a ni lo, tuna an inkulh rihnaah hian awm reng tir kan tum lo,” a ti bawk.

Henglai hmuna Police Duty-te leh khaw-tlang hruaitute hnenah phai khawlum karah ram leh hnam hmangaihna avanga duty-te chungah Rajya Sabha MP chuan lawmthu a sawi a. Duty-te hian Mobile Phone Signal chhiat thu te, kawng leh electric lama an harsatna te lo hrilhin theihtawp a chhuahpui tur thu MP hian a hrilh bawk.

Nimin-a henglai hmun tlawhtu Rajya Sabha MP hian Buarchep, Phainuam-a Police Duty-te inkulhna turin Silpauline engemaw zat a pe a, heng lai hmuna khawtlang duty-te thingpui in na tur pawisa a pe bawk. Rajya Sabha MP hi Kolasib District thuneitute leh Police hotute bakah khawtlang hruaitu ten an tawiawm a ni. 

Comments

Chhiar Hlawhte