Latest News

Mizoram Police Duty Post thiah DC in sawifiah

Kolasib District Bawrhsap chuan Mizoram Police duty-na hmun pahnih (2) te chu Assam Police ten an thiah thu a sawi.

Nimin-a a Pisa a thuthar thehdarhtute a kawmna ah Kolasib District Bawrhsap. Dr. H. Lalthlangliana chuan tunhnaia Mizoram leh Assam ramri hnaih a buaina thleng chungchang hi sawiin, Hailakandi DC nen inbiakna an neih reng thu leh an inbiakna angin sipai duty pawh dah a nih thu a sawi a. Thuthar lakhawmtute zawhna chhangin Dr.H.Lalthlangliana chuan Mizoram Police duty-na hmun 2 te chu Assam Police hian an thiah ngei thu a sawi a, amaherawh chu heng duty post 2-te hi District pahnih DC-ten duty-na tura an ruahmanna hmun a nih loh thu leh Duty-na tura an tihna hmun ah chuan tanhmun nghet taka khuarin an la duty reng thu a sawi a ni.

Kolasib DC chuan Duty post thiah a nih chungchangah hian Hailakandi DC chu be nghalin hetianga chetna a awm leh a nih chuan khauh tak a chhan let a nih tur thu a hrilh tih a sawi a. District pahnih DC-te inbiakna atanga duty-na tur hmun ruahman atang hian Mizoram Police-te hi pen khat pawha an la tawlhlet loh thu a sawi bawk. Sawrkar hmalakna tithuanawp thei zawng a khawtlang leh tlawmngai pawl hrang hrangte ramri chungchangah hian kal fawr bik awm lova sawrkar thu ngaichang thiam turin DC chuan mipuite a ngen a, Police duty-te dinhmun tiderthawng thei thil Social Media kaltlanga thehdarh lo turin a chah bawk a ni.

Comments

Popular News (Last 30 Days)