Latest News

Mizoram sawrkar in ramri buaina muanawm taka chinfel thuai a nih a beisei - Home Minister

Home Minister Lalchamliana chuan Mizoram Sawrkar chuan Assam leh Mizoram inkar ramri buai chu muanawm takin, Dawhkan kil-a chinfel thuai a nih a beisei tih sawiin, “Boruak tha tak hnuaia inbiakna a awm leh theih nan Mizoram Sawrkar chuan Assam Sawrkar pawh a tihtur tha taka ti turin a beisei a ni,” a ti.

Nimin-a Mizoram leh Assam inrina, Vairengte dai-a thil thleng chungchanga nizan-a Press Statement a siamah Home Minister, Lalchamliama chuan Assam IGP kaihhruaina hnuaiah Cachar DC, Cachar SP, Cachar DFO leh Assam Armed Police 200 rual vel zet chu nimin, July 26, chawhma dar 11:30 khan Vairengte Auto-Rickshaw Stand-ah an lolut tih sawiin, CRPF ten an ven lai Duty Post chu tihluihnaa rawn paltlangin Mizoram Police tam vak lovin an ven mek pawh an kalpel tih a sawi a. Assam Police te hian Lailapur lam atanga Vairengte pana National Highway-a tlan motor engemawzah an tichhe bawk niin a sawi.

Home Minister chuan Assam Police ten buaina an siam tih hriat a nih veleh Vairengte khaw mipuite chuan thil awmzia hrechiang turin thil thlenna hmun an pan tih sawiin, Ralthuam kenglo Civil mi te hi Assam Police chuan Tiang (lathi) nena beiin Tear Gas in an kap bawk a, civil mi engemawzatin hliam an tuar tih a sawi a. “Kolasib SP leh Executive Magistrate te pawh rang takin buaina thlenna hmun an thleng zui nghal a. Harsatna chinfel tuma an hmalakna chu Assam lam Police leh Official dangte hian pawisa lovin Dawhkan kilin engmah sawipui theih an ni lo,” a ti a. Hemi hnu hian buaina punlun zelin Assam hian Tear Gas mai duh tawk lovin Grenade hial an chelek zui ta tih a sawi a, “Assam Police hian tlai dar 4:50 bawr velah silai an hmet puak tan ta a ni,” a ti bawk.

Assam lamin silai an hmehpuah tak avang hian Civil mite chhan nan Mizoram Police pawhin silai an hmetpuak zui ve nghal tih Home Minister chuan sawiin, hetihlai hian Kolasib SP pawh CRPF Duty Camp-ah Assam Police hotute nen an in dawr mek tih a sawi a. “Assam Police-in CRPF leh Mizoram Police duty te zahpahna nei lova paltlang luiin Mizoram chhung ngeiah Vairengte Auto-Rickshaw Stand hial an rawn lut ta mai hian nunaute a tithlabarin, boruak nasa takin a tichhia a. He thil thleng hi a pawi tak zet a ni,” a ti a. Union Home Minister chuan Assam leh Mizoram Chief Minister ve ve te a biak hnuah Assam Police te hi an tawlh kir ta chauh nia sawiin, CRPF mi leh sa te hnenah an duty post pawh an hlan kir leh ta tih a sawi a ni.

Mizoram chhungah dan lova Assam Sawrkar in buaina a siam ta mai hi Mizoram Sawrkar chuan na takin a dem tih Home Minister chuan sawiin, “He buaina pumpelh theih a nih reng laia hetiang anga Assam lamin buaina nasa tak an rawn siam avanga hliam tuar an awm hi Mizoram Sawrkar chuan pawi a ti takzet a. Tun hnuah hetiang thil hi thleng tawh lo se a duh hle a ni,” a ti a. Mizoram Sawrkar chuan Assam leh Mizoram inkar ramri buai hi muanawm takin, Dawhkan kil-a chinfel thuai a nih a beisei tih pawh sawiin, “Boruak tha tak hnuaia inbiakna a awm leh theih nan Mizoram Sawr-kar chuan Assam Sawrkar pawh a tihtur tha taka ti turin a beisei a ni,” a ti bawk.

Hetianga ramri-a buaina thleng a awm avang hian nimin vek khan I&PR Minister Lalruatkima leh School Education Minister Lalchhandama Ralte bakah Serlui bialtu MLA, Lalrinsanga Ralte te chuan Vairengte an pan nghal a ni.

Nimin-a ramri-a buaina thleng ah hian Mizoram Police leh Civil mi zingah nunna chan an awmlo nia hriat a ni a, hliam tuar mi 2 an awm nia hriat niin Assam Police lamah chuan mi 6 in nunna chanin mi 45 in hliam an tuar nia thu-dawn a ni thung.

Comments

Chhiar Hlawhte