I-Day hman dan tur rel

Thla thar August 15-a India Independence Day lo thleng tur chu Serchhip-ah chuan zingkar ah DC Office Tual-ah a lawmna neih a ni ang.

India Independence Day vawi 75-na lo thleng tur Serchhip-a lawm dan tur ngaihtuah hian nimin khan Serchhip DC Meeting Hall-ah District Bawrhsap, Kumar Abhishek hovin sawrkar mi pawimawh te an thukhawm a. He hunah hian Bawrhsap chuan kan boruak tawn mekte enin he ni lo thleng tur hi nikum ang thova Head of Offices leh Media mite nena hman leh a tul dawn nia a lan thu sawiin, thuneitu sang zawk atanga a hman dan tur ruahmanna pawh lo la kal thei a ni tih a sawi bawk.

He thutkhawm a tel te hian India Independence Day hi August 15, 2021 (Pathianni) zing dar 8:00-ah hman nise tiin a hmun atan DC Office tual ruahman a ni a, kumdang ang bawkin he ni pual hian Homes, Hospitals leh Jail-ah te thilpek hlan leh a ni anga. Khuallian tur chu sawrkar thuneitu sang atanga ruahmanna a awm beisei a ni a, Parade Contingent an awm dawn loh avangin khuallian hi Rashtrya Salute pek a ni thung ang. At Home Tea Party neih a ni lo bawk ang.