Mat lui-ah ruang chhar a ni

Nimin khan Mat Lui-a Chawm kai-ah ruang pakhat hmuh niin enfiah a nih hnuah Mangkhama (56), Serchhip Darnam Veng-a khawsa tih hriat a ni.

Thudawn danin nimin chawhnu dar 2:00 vel khan Chawm Kai-a kal mi thenkhat chuan Lei atangin Mat lui-a ruang pakhat lo lang hi an hmu a, khawtlang hruaitute hriattirin Police lam hriattir an nih hnuah ruang hi lakchhuah a ni a. Hetah hian Mangkhama (56), Serchhip Darnam Veng-a khawsa thin a ni tih finfiah niin nimin tlai khan a ruang hi Postmortem nghal a ni.

Mangkhama hi Myanmar lam chhuak niin kum 30 vel zet liamta atang khan Serchhip Sailiamkawn-a Mante-i te In-ah a khawsa thin a, hna chi hrang hrang thawk thinin kumin kumtir lam khan Lalduhawma, Darnam Veng te Huan enkawlin a zawm zui a. Kar hmasa khan ram-riak-ah in Zirtawpni khan an hawsan a, nimin khan a ruang hi hmuh a ni zui ta a ni. A taksa ah hian hliam hnuhma emaw hmuh tur awm lovin tui-a chesual nia rin a ni a, a ruang hi Lalduhawma hian an In-ah lain nizan khan vuiliam nghal a ni.