A hma aia fimkhur zui zel a tul

A hma aia fimkhur zui zel a tul

Mizoram-ah hun engemaw chen hri leng avanga Total Lockdown te kalpui a nih hnuah sawrkar chuan mipui khawsak harsatna thleng thei thlir chungin inkharkhipna te chu tun thla atangin tlem-a thlahdul hret turin rua-hmanna a siam a, hemi ang hian Serchhip ah pawh inkaihhruaina thar siam niin Dawr te pawh a hma aia zing zawka hawn theih ni tawhin mipui phur chi lirthei te pawh an service ve leh thei tawh dawn a. Hri leng avaga mipui ten ei leh bar dapna kawnga hun rei tak kan harsatna tawh te hriaa kan sawrkar in rua-hmanna thar a rawn siam hi a lawmawm hle mai a, chutihrual chuan hri leng lakah erawh kan fimkhur zui zel ala tul a ni.

Serchhip-ah hian hun engemaw chen chu hri kaina hriatloh leh chhui zui ngai kan nei ta lo niin a lang a, tuna hri kai kan hmuh leh neih mek te pawh State pawn atanga rawn lut leh anmahni nen inkawmhnaihna an neih avanga inkhunghrang lai te an ni a. Hei vang hian inkharkhipna kan kalpui mek kan thlah-dul ta deuh tur pawh hi a awm viau tih theih a ni ang. Amaherawh chu hri leng avangin Mizoram hmun tam takah harsatna kan la tawk mek a, nitin maiin hri kaina hriat loh leh chhui zui ngai pawh an la awm belh zel a, hei vang hian fimkhurna erawh kan nitin nun ah kan vawn reng a pawimawh dawn a ni.

Sawrkar in hri leng avanga kan har-satna tawh te hriaa inkhuahkhirhna a thlahdul avang hian hri leng dinhmun hi a ziaawm ta sawt tihna a ni lova, a hma aiin inkaichhawn a hlauhawm ta lo tih pawh a ni hek lo. Amah-erawh chu kan harsatna tam tak sutkianna tura hmalakna pawimawh a nih avangin he hri leng mek laka kan him theihna tur kan hriat te kha tha lehzuala kan zawm a tul zawk a ni.