Latest News

LAD Minister in Mamit District-a ramri a tlawh

Local Administration Department changtu Minister, K. Lalrinliana chuan nimin khan Chuhvel, Rengdil, Kawrthah leh Tuidam khua te a tlawh.

Kumin May 30-a John Haliday-a'n a huan, Chuhvel ramchhunga a Thlam sak mek, Assam lam mi uniform ha engemawzatin kalchilha sak chhunzawm tawh lo tura an tih thu kalzelah Minister hian Chuhvel khua hi tlawhin Chuhvel mipuite chu a thlamuan a. Kan ram-a ruihhlo rawn tawlhruk tum ven a, kan ram chhunga hmasawnna hna thawh leh Sipai te duty-na hmun siam chu Sawrkarin a ngaihpawimawh ber a nih thu a sawi bawk.

Chuhvel rama buaina awm chungchangah hian Mamit District Bawrhsap, Dr. Lalrozama IAS chuan boruak muanawm a awm theih nan theihtawpa hmalak mek zel a nih thu a sawi a. Helai huan ram Pass hi John-a hian Periodic Patta No. 122 of 1985 chu Asst. Settlement Officer, Mamit District atanga a neih thu leh John-a'n a lei hma pawhin a neitu hi Mizo vek an nih thu a sawi a. He ram chungchanga an hmalak dan tarlangin June 2 khan Mizoram chhunga Assam Police leh mipuite rawn kal a, loneitute an rawn vau thin chu thil duhawm lo tak anih thu leh tunhnuah harsatna rawn siam tawh lo turin Hailakandi DC hnenah lehkha a thawn thu a sawi a. June 11-ah Hailakandi DC hnenah bawk Mizoram chhung, John-a huan rama lut tawh lo tura hriattirna lehkha a thawn leh thu leh report kimchang Home Department-ah a thlen thin thu bakah SDO(C) Kawrthah leh SDPO te'n an hmunah hian an vil reng thu leh Assam sipai an rawn chetchhuah apiangin an rawn kal ni la lain a hmun an pan chilh nghal zel thu a sawi a. A hmunah hian boruak thalo thleng palh thei veng turin 3rd Battalion MAP, 4th IR bakah CRPF Platoon 1 an awm mek thu sawiin, CRPF te hian John-a huanah hian nitin darkar 24 Patrolling an neih thin thu a sawi a. July 1 khan Home Department-ah Security Force Duty dah belh tura ngenna a thlen thu a sawi bawk.

Minister hnenah hian Chuhvel khawtlang mipuite'n an harsatna leh mamawhte lo thlenin Chuhvel khawchhung atanga Hnanglui Zau panna kawng (KM 1.7) siamthat an dil chu Minister hian a theih ang anga hmalakpui a tum thu a sawi a. Chuhvel Jt. NGO thurel angin Chuhvel khua-a Police Outpost dah turin Minister hnenah hian an lo thlen bawk.

Supply Department changtu Minister ni bawk. K. Lalrinliana hian nimin vek khan Rengdil leh Tuidam Supply Godown leh Staff Quarter sak mekte a tlawh a. PWD Kawrthah Division IB-ah Secretary leh Director, FCS&CA, EE PWD Kawrthah te nen nitin-a Mizoram mamawh hrang hrang eirawngbawlna Gas, Petrol leh Diesel lakluh chungchangah inkawmhona an nei nghal bawk.

Comments

Chhiar Hlawhte