Latest News

Thenzawl-a Supply Kudam-a bukna enfiah niin Buhfai an buk a tling tha tih finfiah a ni

Serchhip District Consumer Association leh Serchhip-a Legal Metrology Department te chuan nimin khan Thenzawl-a Supply Kudam chu sawilawk awm lova enfiahin bukna an hman te an enfiah a, an buhfai buk chu a dik hle tih an sawi.


Serchhip District Consumers Association hruaitute hnen atanga thu kan dawn danin tunhnaiah Thenzawl leh a chhehvelah hian Retailer ten mipuite hnena buhfai an pekchhuah chu a buk tlinglo nia sawi a awm a, hemi chungchangah hian Serchhip District Consumer Association te chuan hma lain mipui chanai buhfai buk a tlinloh chhan hi an chhui a. Retailer lam hian Kudam atanga an buhfai an lakchhuah chu a diklo nasa lutuk thin ni a an sawi avangin Kudam hi enfiah leh tul nia an hriat avangin nimin khan sawilawk awm lovin an enfiah a. Nimin chawhnu lama Thenzawl-a Supply Kudam an tlawh lai hian Buangpui Retailer te buhfai sem tur lo pekchhuah mek niin hei hi motor atangin hlanthlak tir leh vekin Legal Metrology te leh Consumer Association hruaitute hmuh laiin buk thattir leh vek a ni a, heta an buk that lehna atanga a lan danin Supply Godown atanga Retailer ten buhfai an lakchhuah hi a buk a dik hle tih finfiah a ni tih an sawi a ni.

Serchhip District Consumer Association chuan Thenzawl-a Supply Godown enkawltute chu Buhfai dik taka an buk avangin lawmthu sawiin, mipui ten an chanvo tur an changlo a nih chuan Supply Godown lam ni lovin Retailer lam mawhphurhna a ni tawh zawk nia an ngaih thu an sawi a. Thenzawl leh a chhehvel a Retailer te chu remchang hmasa berah mipuia an buhfai semchhuah a dik leh dikloh Legal Metrology Enforcement Staff te nen an enfiah leh thuai tur thu leh dan zawmlo an awm anih chuan an chungah hremna lekkawh anih tur thu an sawi bawk.

Hei bakah hian Serchhip District Consumers Association chuan Sawrkar thuchhuak ah Mizoram pumah retailer ten  E-pos Machine leh Digital Weight Scale hmanga Buhfai an pe tawh tur anih laiin Thenzawl leh a chhehvela tun thlenga Digital Weight Scale an la hmang lo chu thalo an tih thu sawiin, Supply Department hotute hnenah thlen an tum thu an sawi bawk.

Comments

Chhiar Hlawhte