Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Mizoram-ah hri danna la thei zaa 68 vel pe tawh

Mizoram pumah COVID-19 hri laka invenna, vaccine dose 588,420 pekchhuah tawh a ni a, vaccine la thei zat atanga chhutin zaa 68 velin vaccine dose khatna hi an la tawh a ni.

State Immunization Officer Dr. Lalzawmi sawi danin Mizoram-ah hian kum 18 leh 44 inkar mi 2,77,349-in hri danna hi an la tawh a, Vaccine la zingah a dose khatna la zat hi mi 5,34,860 niin, a dose hnih-a la kim tawh mi 60,399 an awm tawh a ni. Mizoram-a COVID-19 Vaccine la te zingah Healthcare Workers mi 11,720 te chuan vaccine an lak tur hi an la kim tawh a, Frontline Workers mi 19,590 te chuan an lak tur la kim tawh bawkin kum 60 chunglam mi 19,993 te pawhin vaccine an lak tur an an la tawh bawk a, kum 45-59 inkar mi 8828 leh kum 18-44 mi 97 ten Vaccine an lak tur an la kim tawh bawk a ni.

Health Minister Dr. R. Lalthangliana chuan kum 18 chunglam zawng hri danna dose khatna pek kawngah State dangte nena khaikhinin Mizoram chu a titha pawl a ni tih a sawi a, State leh UT zingah a titha pasarihna a ni a, India hmarchhak State-te zingah chuan a titha pathumna a nih thu leh kum 18 chunglam zawng zawng pek tur bituka chhut zinga zaa 68-te chu hri danna dose khatna pek an ni tawh tih a sawi a ni.

Comments

Chhiar Hlawhte