Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Agri. Minister in Laboratory Building sak mek a tlawh

Agriculture Minister C. Lalrinsanga chuan nimin khan Lunglei Civil Hospital tlawhin Laboratory Building sak mek pawh a hmunah a tlawh nghal bawk.

Agriculture Minister hian Lunglei Civil Hospital Truenat Laboratory tlawh hmasain an test kalpui dan tlangpui leh Truenat khawl dinhmunte thawktute a sawipui a, mamawh an neihte sawrkarah thlen vat thin turin a chah a ni. Tun dinhmunah Lunglei Civil Hospital Truenat Laboratory-ah Truelab Quattro khawl pali (4) a awm mek a, June 2021 chhung khan TrueNat Test 2458 neih niin Covid-19 hri kai mi 120 hmuhchhuah an ni a, RAgT 5064 atangin Covid-19 hri kai mi 363 hmuhchhuah awmin ZMC Laboratory-a sample test tur 490 thawn atangin Covid-19 hri kai mi 19 hmuhchhuah an ni bawk.

June ni 17, 2021-a bultan Lunglei Civil Hospital Compound-a Laboratory Building sak hna kal mek chu Minister hian a hmunah an enfiah nghal a. Laboratory Building/Block hi Lunglei Civil Hospital-a Trauma Centre sak mek bul chiah, H&FW Department Staff Quarter hlui awmna ah sak tum a ni a. Laboratory Building ruahman mek hi a dung zawng 30.8 metres tur niin a vang zawngin a zau lai berah 13.65 metres tur a ni a. Minister chuan Lunglei Civil Hospital Compound-ah Laboratory changtlung tak, Mizoram mipuite tana ro tling tur sak hna kalpui mek chu tluang tak leh harsatna awm lova peihfel thuai anih theih a beisei thu a sawi bawk.

Agriculture Minister hian Lunglei HPC Vice Chairman Lawmawma Tochhawng leh Bamboo Development Board Vice Chairman Dr K. Pachhunga te nen chawhnu lamah Lunglei Circuit House-ah thuthar thehdarhtute an kawm nghal a. Minister chuan a Department chan pathum hnuaia hmalakna hrang hrang kal mekte sawiin, Mizoram-ah Agriculture lama harhtharna a thleng mek tih a sawi a, sawrkar laipui, NABARD, IFAD, United Nations Food and Agriculture Organization (FAO) etc te kaltlangin Mizoram hmung hrang hrangah Agriculture kaihhnawih hmalakna lian tham tak tak kalpui mek a ni tih sawiin, Farmer Producer Organisations 10,000 din tura hmalak mek a nih thu leh Bio Fertilizer Unit Sihphir, Neihbawih-a kalpui mek chu Mizoram hmun dangah te pawh kalpui tum a ni a, Kuthnathawktu ten thlai chi tha leh duhtawk an hmuh theih nan thlai chi tih punna leh dah thatna, Seed Bank leh Seed Village te pawh kalpui zel tum anih thu a sawi.

I&WR hnuaia Southern Data Centre tur, Lunglei Chanmari-a sak mek chu National Hydrology Project hnuaia kalpui niin kan lui leh tuihna dinhmunte zirchianna kawnga hmanraw pawimawh tak ala nih dawn thu leh Van Dhan Mission pawh kalpui mek zel a nih thu a sawi bawk.

Comments

Chhiar Hlawhte