Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Inkharkhip avangin Aizawl khawpui chhungah thei leh thlai sem dan tur ruahman a ni

Aizawl Municipal Municipal Corporation (AMC) huamchhungah Total Lockdown kalpui a nih leh tak avang leh Containment Zone-a puan Veng a tam tak avangin thei leh thlai sem dan tur ruahmanna an siam tih Horticulture Department Director, Dr. Elizabeth Saipari chuan a sawi.

COVID-19 Fruit & Vegetable Supply Chain Committee-a Member Secretary ni bawk Dr. Elizabeth Saipari chuan tun tumah hian kharchhawng kalkanin LLTF te leh thlai thartute inbiain an indawr tawh dawn tih a sawi a. Hemi atan hian ruahmanna an siam thu leh an indawrna ah hian harsatna an nei a nih pawhin Veng tin tan an harsatna sutkian puitu tur Zonal Officer ruat an ni thu a sawi a, he ruahmanna hnuaiah hian thlai man pawh a tlawm duai dawn zawk ni a sawi a ni.

Tun tuma sawrkar in ruahmanna a siam dan chuan Thlai hnephnawl (Maian, Behlawi leh thlai rah chi hrang hrang), Lo lam leh Leipui lama an thar te chu khaw tam zawkah a thar vanglai a nih avangin a tharchhuaktu khua te leh LLTF-te direct-a indawr tura tiin biakpawh theihna tur tihchhuah a ni a. Thlai thar tam bik 'Centralised Item' an tih hnuaia mi Tomato, Zikhlum, Bawkbawn leh a dangte chu LLTF ten Zonal Officer kaltlangin an Order thung dawn tih sawiin, heng Centralised Item bik te hi Horticulture Office atangin an la chhuak anga, LLTF harsatna nei chu Supply Chain-in a deliver lamah pawh an puih theih dawn thu a sawi bawk.

Ruahmanna an siam dan chuan, AH&Vety Department in Sa leh Fisheries Department in Sangha an chang a, heng Department-a mawhphurtute number pawh LLTF zawng zawngah thawn tel vek a ni a. LLTF sum lama harsatna nei an awm a nih chuan an la phawt anga, an Veng-a an hralh zawhah a man chu MIZOFED-ah an chhunglut leh ang a, an chhunluhte chu a thlai thar neitute hnenah hlanchhawn leh a ni dawn bawk.

Chawhmeh Supply turah hian Tomato chu Sairang Cold Storage-ah quintal 30 stock an nei mek tih Dr. Saipari chuan a sawi a, thildang pawh order a awm hun apianga lo kal nghal thei turin an inring sa vek tih a sawi bawk. Fruit and Vegetable Supply Chain-ah hian Horticulture Department bakah Commerce and Industries leh MIZOFED te an thawkho a, hripui avanga kuthnathawktute leh mipuite chhawk zangkhai turin theihtawpin hma an la tih a sawi a. Phai lama Tomato leh thlai dang a lo luh lohna turin commission ti thinte pawh a sawipui tawh thu a sawi bawk.

Comments

Chhiar Hlawhte