Karleh atangin raipuar te vaccine pe dawn

Mizoram-a COVID-19 vaccine pek hna kalpui mekah karleh Thawhtanni atang khian raipuar te vaccine pek tan tum a ni.

Nimin khan Health Minister Dr. R. Lalthangliana hovin Mizoram-a COVID-19 hripui leng dinhmun thlirhona chu SAD Conference Hall-ah neih a ni a, he hunah hian Mizoram-a COVID-19 vaccine pek tawh dan thlirho niin July 8, 2021 thleng khan Vaccine dose 6,44,739 pekchhuah tawh niin, vaccine Full Dose la tawh mi 78,006 an awm a. Electoral Roll thar ber atanga chhutin Mizoram-ah kum 18 chunglam Vaccine pek theih mi nuai 7.75 an awm a, tunah hian Vaccine First Dose la tawh zat hi 73% a ni a, First Dose la tawh atanga chhutin za zela 40 te chuan Second Dose an la tawh a ni. Tun dinhmunah vaccine khawlsa a awm that thu tarlan ni bawkin Raipuar te tan karleh Thawhtanni atangin vaccine pekchhuah tur a ni tih tarlan a ni a, hemi atana inbuatsaihna hi tluang takin a kal mek tih tarlan a ni bawk.

Health Department in District an then angin Aizawl West-ah 93% leh Aizawl East-ah 92% ten vaccine la tawhin, Serchhip District-ah 79% in vaccine an la tawh a. Hmarchhak State zingah Mizoram chu hri danna pek tamna ber a ni bawk.