Serchhip-a zirlai tithate lawmpuina tur sum hlan

MNF General Hqrs. a Secretary, Vanlal-tluanga chuan HSLC leh HSSLC Exam result chhuaka Serchhip-a zirlai tithate hnenah nimin khan MZP Hqrs. Serchhip kaltlangin lawmpuina a hlan.

Zirlai tithate lawmpuina hi Rs. 34,000/- chu Vanlaltluanga aiawh hian Serchhip East Block MNF Treasurer, K. Tlangthanmawia chuan MZP Hqrs. Serchhip President, H. Lallawmkima hnenah a hlan a, he hunah hian K. Tlangthan-mawia chuan Vanlaltluanga hian Serchhip Bial hi a ngaihsak hle tih sawiin, tun tumah pawh hian zirlai tithate lawmpuina hi hlan ngei duhin, hri leng avanga remchan zawkna zawngin sum leh pai te hi Bank Account hmanga rawn thawnin, MZP kutah hian an hlan thu a sawi a ni.

He hunah hian MZP Hqrs. Serchhip-a Secretary, Laltlanmawia chuan kumin a HSLC leh HSSLC Exam result chhuakah hian zirlaite an titha thawkhat tih sawiin, Serchhip-ah HSLC Zirlai 52 ten Distinction-ah pass in HSSLC-ah zirlai 6 ten Distinction-ah an pass thu a sawi a. Hei mai bakah hian Mizoram puma Top 10-a lang zirlai pathum an awm thu pawh sawiin, kum danga an lo tih tawh thin angin zirlai tithate hi chawimawina buatsaih an tum thu leh tun tumah hetianga zirlaite tana mi thilphal rawn che chhuak an awm chu lawmawm an tih thu a sawi bawk.

Zirlaite lawmpuina hlantu Vanlaltluanga hi Aizawl Bethlehem Veng-a cheng niin MZP te hnena pawisafai a rawn hlan hi Distinction a pass te hlan an ni anga, hei bakah hian Top 10-a lang te hi Rs. 1000/- theuh hlan tum an ni bawk. MZP te hian heng zirlai tithate hi nimin khan an chenna In-ah kalchilhin an hlan chhawng a ni.