Pathianni-ah hri kai mi 190 hmuh belh leh an ni

Pathianni khan Mizoram-ah Sample 996 enfiah leh niin heng atang hian hri kai 190 hmuhchhuah leh an ni a, Sample enfiah atanga za zela 19.07 te chuan hri kaiin Mizoram-ah COVID-19 hri kai hmuhchhuah an la pung zel a ni.

Pathianni khan ZMC-ah Sample enfiah awm lovin District hrang hrangah TrueNat Laboratory-ah Sample 229 enfiah niin hri kai mi 23 hmuhchhuah an ni a, heng zinga mi 11 te chu Kolasib District ami te niin Bairabi-ah 6 leh Meidum-ah hri kai mi 5 hmuh an ni a, Mamit District-ah hri kai mi 11 hmuhchhuah niin Dapchhuah-ah hri kai mi 6 zet hmuh an ni a, Lawngtlai District-ah hri kai pakhat hmuh a ni leh bawk.

Rapid Antigen Test hmangin Pathianni khan Sample 767 enfiah ni bawkin hri kai 176 hmuhchhuah an ni a, heng zinga 148 te chu Aizawl District ami te niin Tuirial-ah hri kai mi 16 zet hmuh an awm a, Bethlehem Vengthlang, Khatla East leh Venghlui-ah hri kai mi 10 theuh hmuh niin hri kai hmuhchhuah tam zualna an ni. Kolasib District-ah hri kai mi 7 hmuh ni bawkin Lunglei District-ah hri kai mi 5 hmuh an ni a, Mamit District-ah hri kai mi 4 hmuh niin Siaha District-ah 2 leh Lawngtlai District-ah hri kai mi pakhat hmuh an ni bawk.

Heti hian nimin thlenga Mizoram-a COVID-19 hri kai hmuh tawh chu 24,183 an tling ta a, nimin khan hri kai mi 185 te chu enkawl dam niin anmahni enkawlna hmun atanga chhuahtir an ni a, heti hian nimin thlenga Mizoram-a hri kai enkawl dam chu 19,803 niin hei hi hri kai hmuhchhuah atangin zaa 81.88 a ni a, tunah hian hri kai enkawllai 4268 an la awm mek a. Mizoram District hrang hrang 11 zingah hri kai enkawllai neilo awm lovin hri kai enkawllai tamna ber Aizawl District-ah mi 2705 enkawl mek an ni.

Nimin-ah Hri kai zingah mi 4 boral an awm :

Nimin khan Mizoram-a COVID-19 hri kai zingah mi 4 lai boral awmin nimin thlengin Mizoram-a hri kai zingah mi 112 an boral tawh. Nimin zingdar 2:40 khan Lalchhuanthangi (88), Laipuitlang, Aizawl chu ZMC-ah a boral a, nimin zing dar 4:30 khan Lalropuia Pachuau (64), Falkland, Aizawl chu ZMC-ah bawk boral lehin Thanseii (84), Ramhlun Vengthar chu nimin chawhnu dar 1:30 vel khan ZMC-ah hian a boral ve leh bawk. Nimin chawhma dar 11:00 vel khan Vansangpuii (39), New Vengpui, Lawngtlai chu ZMC panpui a nih laiin a boral bawk a, thudawn danin Vansangpuii hian niminpiah khan COVID-19 a kai tih hmuhchhuah niin naupai lai a ni a, ZMC panpui niin Mualthuam khaw dai an thlenpui laiin a boral zui ta a ni. Heti hian nimin thleng khan Mizoram-a hri kai te zingah mi 112 zet an boral ta a ni.