Hri kai te hnu chhui zel a ni

Kar hmasa Thawhtanni-a Serchhip-a CO-VID-19 hri kai mi pahnih hmuhchhuah an nih avanga an lo kawm hnaih chhuina kal zelah mi za ruk chuang te Sample lak a ni tawh.

Serchhip CMO Office atanga thu kan dawn danin kar hmasa Thawhtanni-a Serchhip-a tualchhung a hri inkaichhawng nia hriat COVID-19 hri kai mi pahnih hmuhchhuah an nih hnuah heng mi ten an lo kawm hnaih te chhui zui hna chu ngawrh taka thawh nghal a ni a, Pathianni thleng khan mi 650 vel te Sample chu lakkhawm a ni tawh a, heng atang hian P&E Veng-ah hri kai mi 3 hmuh belh niin Chanmari Veng-ah hri kai mi 12 hmuh belh an ni bawk a. Heng bakah hian Serchhip atanga hri kai nia hriat, Aizawl lamah hri kai hmuhchhuah an awm bawk a ni. 

Serchhip CMO Office-a thawktute chuan hri kai hmuhchhuah ten an lo kawm hnaih chhui zui hna hi ngawrh taka an thawh thu sawiin, nimin lamah pawh Sample engemaw zat chu lak a nih thu leh heng te hi enfiah nghal zel a nih thu an sawi bawk.